Thursday, November 21, 2013

မာန်(တောင်လုံးပြန်) ၏ ပဲ့ကိုင်ရှင် မဂ္ဂဇင်းအယ်ဒီတာများနှင့် တွေ့ဆုံခြင်း အပိုင်း (၆)

ကျွန်တော် တို့က အဲဒီလိုမျိုး ဆန်ခါစိပ်စိပ်နဲ့ တိုက်တဲ့အတွက် ရွှေအသစ်လို့ တင်ပေးလိုက်တဲ့ ကလောင်သစ်က ဒေါင်ဒေါင်မြည်တာတော့ အမှန်ပဲ။ ကျွန်တော်တို့ တင်ပေးလိုက် တဲ့ ရွှေအသစ် တော်တော် များများ တခြားမဂ္ဂဇင်းတွေမှာ ၀င်ရေးနေတာ။ နေရာ ရနေတာ တွေ့ရတဲ့အတွက် ၀မ်းသာတယ်။ ကိုယ့်သား သမီးတွေလိုပဲ။ သို့သော် ကျွန်တော် တင်ပေးလိုက်တဲ့ တချို့ ကလောင်သစ်တွေက တခြားမဂ္ဂဇင်းက ဖွင့် ထားတဲ့ အသစ်ကဏ္ဍမှာ ၀င်ရေးတာတော့ ကျွန်တော်မကြိုက်ဘူး။ ရွှေမှာ အသစ်အဖြစ် ၂ ခါ ပါပြီး ရိုးရိုး ၀တ္ထုတွေမှာ ၀င်ရေးနေပြီး တခြားမှာ အသစ်အဖြစ် ၀င်ရေးနေတာတော့ ကျွန်တော် မကြိုက်ဘူး။

စာတည်း။     ။  ဟုတ်ကဲ့၊ ဆရာ့ကို အထူးပဲ ကျေးဇူးတင်ပါတယ်။
ကို ဆက်ဖတ်ရန် ..... 

ဆရာမျိုးမြင့်ညိမ်း
(၂၀၁၀ ခုနှစ်)


မြန်မာနိုင်ငံရဲ့ အယ်ဒီတာလောကမှ ဘ၀တစ်လျှောက်လုံး အယ်ဒီတာဘ၀နဲ့ ဖြတ်သန်းကြသူတွေ ရှားပါးပါ တယ်။ အဲဒီရှားပါးတဲ့အထဲက တစ်ယောက်ဖြစ်တဲ့ ဆရာမျိုးမြင့်ညိမ်းကို ဘ၀ဖြတ်သန်းမှု ပုံရိပ်တွေ အင်တာ ဗျူးဖို့အတွက် ကျွန်တော် ပြင်ဆင် လေ့လာခဲ့ချိန်မှာ အင်တာနက် စာမျက်နှာတွေထဲမှာရော မဂ္ဂဇင်း စာမျက် နှာတွေထက်မှာပါ ဆရာနဲ့ပတ်သက်တဲ့ ဆောင်းပါးတွေ၊ အင်တာဗျူးတွေ တွေ့ခဲ့ ရပါတယ်။ ကျေနပ်စရာ ကောင်းတာက ဆရာဟာ စာအင်မတန်ဖတ်တယ်၊ ထူးထူးကဲကဲကို စာဖတ်ဝါသနာ ပါတယ်လို့ သိရတဲ့ အတွက် ကျွန်တော်တို့အဖို့ ဗဟုသုတများစွာ ရတော့မှာဖြစ်လို့ ဝမ်းသာမိပါတယ်။

ဆရာ့ကို ၁၉၅၂၊ ဇွန် ၂၈ ရက်နေ့ မွေးဖွားခဲ့ပြီး အသက် ၂၅ နှစ်အရွယ်ကတည်းက အလုပ်သင်အယ်ဒီတာ ဘ၀နဲ့ စာပေနယ်မှာ ကျင်လည်ခဲ့တာ အခုဆိုရင် အနှစ် ၃၀ ကျော် အယ်ဒီတာ အတွေ့အကြုံရှိနေသူဖြစ်ပါ တယ်။ ဆရာနဲ့ အင်တာဗျူးတဲ့အခါမှာ ခိုင်မာပြတ်သားတဲ့ စကားလုံးတွေ၊ ဟာသပါတဲ့ အဖြစ်အပျက်တွေ၊ အမှန်ကို အမှန်အတိုင်း ပွင့်ပွင့်လင်းလင်း ပြောပြခဲ့တဲ့ ၈၈ သမိုင်းကြောင်းတွေ၊ အကျဉ်းစံကာလ မှတ်သား စရာတွေ၊ နိမ့်တုံ မြင့်တုံ လောကဓံ လှိုင်းတွေကို သေသေချာချာ ရှင်းလင်း ပြောပြသွားခဲ့တဲ့အတွက် စာဖတ်ပရိသတ်များအနေနဲ့ သိသင့်သိထိုက်တဲ့ သမိုင်းကြောင်းတွေ အများကြီး သိရမှာပါ။
 ဆရာ့ရဲ့ စေတနာစကားတွေမတွက် ကျေးဇူးများစွာတင်ရှိပါကြောင်း အမှတ်တရ ပြောကြားရင်း ဆရာ့ရဲ့ အင်တာဗျူးကို တင်ဆက်ပေးလိုက်ပါတယ်။

စာတည်း။      ။ မင်္ဂလာပါဆရာ။
    ဆရာနဲ့ ပတ်သက်ပြီး ငယ်ဘ၀ပုံရိပ်တွေ အရင်ဆုံးမေးခွင့်ပြုပါ ဆရာ။ ဆရာ ငယ်စဉ်က မန္တလေးကနေ မိဘတွေနဲ့အတူ ရန်ကုန်ကို လိုက်လာဖြစ်တယ် ဆိုတာကို ဆရာ့အစ်ကို ဆရာဥိးဝင်းငြိမ်းနဲ့ အင်တာဗျူးတုန်း က သိခဲ့ရပါတယ်။ အဲဒီတုန်းက အဖြစ်အပျက်လေးတွေ ဆရာ မှတ်မိ သလောက် ပြန်ပြော ပြပေးပါဦး။ ဆရာ ကျောင်းနေစဉ်က အကြောင်းလေးတွေပါ ပြောပြပေးပါဦးဆရာ။

ဆရာမျိုးမြင့်ညိမ်း။       ။ ဟုတ်ကဲ့။ ... အချိန် ဘယ်လောက်လောက် ကြာမလဲ။

စာတည်း။     ။  ဒီနေ့လား ဆရာ။

ဆရာမျိုးမြင့်ညိမ်း။      ။ မဟုတ်ဘူး။ အားလုံး Total မေးတာ။

စာတည်း။     ။ Total ကတော့ ဆရာ ပြောသလောက်ပဲ။ ကျွန်တော် အားလုံးပေါင်း မေးခွန်း ၂၅ ခု ထုတ်ထား တာပါ။

ဆရာမျိုးမြင့်ညိမ်း။      ။ ... ဆိုတော့၊ အဖေက အစိုးရ၀န်ထမ်းဆိုတော့ အဖေနယ်ပြောင်းတဲ့အခါ၊ မန္တလေး ကနေ ရန်ကုန်ကို ပြောင်းတယ်။ ကျွန်တော် တော်တော်ငယ်ပါသေးတယ်။ ကျွန်တော့်ကို မွေးတာ ၁၉၅၂၊ ဇွန်လ၊ ၂၈ ရက်နေ့။ ကျွန်တော့်ကို မွေးပြီး သိပ်မကြာခင်မှာပဲ တစ်နှစ်ကျော်ကျော်လောက်ဖြစ်မယ် ထင်တယ်။ ရန်ကုန်မှာ အားကစားနဲ့ ပတ်သက်ပြီး ကိုယ်လက်ကြံ့ခိုင်ရေးကောင်စီ ဖွဲ့တဲ့အခါမှာ ကျွန်တော့် အဖေ က လက်ဝှေ့နဲ့ပတ်သက်ပြီး ကိုယ်လက်ကြံ့ခိုင်ရေးမှူးပေါ့။ ကျွန်တော် ဒီ ပါလာတယ်။ ကျွန်တော့် အထက်က ကိုဝင်းငြိမ်း၊ ကိုဆန်နီညိမ်း၊ ကိုရဲမြင့်ညိမ်းနဲ့ ကျွန်တော်က မန္တလေးမှာ မွေး တယ်။ အောက်က လေးယောက်က မာလာညိမ်း၊ စန္ဒာညိမ်း၊ နောက် ... ထွန်းမောင်ညိမ်း၊ ထွန်းအောင်ညိမ်း၊ သူတို့လေးယောက် က ရန်ကုန်မှာ မွေးတာဆိုတော့ အားလုံး ရန်ကုန်မှာ ရောက်ပြီး တစ်ခါ ၁၉၆၃ မှာ ကျွန်တော့်အဖေ က မန္တလေးက တစ်ခါ ပြန်ပြောင်းရတယ်။

မန္တလေး ပြောင်းတဲ့အခါ ကျွန်တော်တို့ မန္တလေး ကို တစ်ခါ ပြန်ရောက်သွားတယ်။ တစ်အုပ်စုလုံး၊ တစ်မိသားစု လုံး၊ တစ်မိသားစုလုံး ပြန်ရောက်သွားတယ်။ ရောက်ပြီးတော့ မန္တလေး အ.ထ.က (၁၀)၊ အခု ခေါ်တာပေါ့။ ဟိုတုန်းကတော့ "ဒိုင်အိုဒီဇင် ဟိုက်စကူး" (Diocezin High Scholl)။ အရင် သီပေါမင်း နေခဲ့တဲ့ကျောင်း။ ဒေါက်တာမတ်စ်ခ် ထူထောင်ခဲ့တဲ့ကျောင်း။ အဲဒီမှာ ကျွန်တော် သုံးတန်း၊ လေးတန်း၊ ငါးတန်း နေခဲ့ရတြယ်။ အဖေက အဲဒီမှာ ၂ နှစ်လောက်ပဲ နေရပြီး ရန်ကုန် ပြောင်းတယ်။ ကျွန်တော်တို့ မိသားစု မန္တလေးမှာ ကျန်ခဲ့တယ်။ တစ်ခါ ... ၁၉၆၅ ခုမှာ ရန်ကုန် ပြောင်းရတယ်။ အဲဒီကနေ ရန်ကုန် မှာ နေဖြစ်ခဲ့တာ အခုထိပဲ။ ရန်ကုန်မှာ ၁၉၆၅၊ ကျောင်းတွေ ပြည်သူပိုင် သိမ်းတဲ့နှစ် ဆိုတော့ အ.ထ.က (၆)ဗိုလ်တထောင်၊ စိန့်ပေါလ်မှာ ကျွန်တော် ကျောင်းနေတယ်။ အဲဒီကနေ ပြီးတော့ ဆယ်တန်းအထိနေပြီး ဆယ်တန်းအောင်တော့ ၁၉၇၄။ အောင်ပြီးတော့ ရန်ကုန်မှာ ပထမဆုံး၊ ဖွင့်ခဲ့တဲ့၊ တစ်ကြိမ် ပဲ ဖွင့်ခဲ့တဲ့ "သဘာဝသိပ္ပံ တက္ကသိုလ်"။

အဲဒီမှာ ပထမနှစ် ကျွန်တော် တက်တယ်။ အဲဒီ ကျောင်းက မြန်မာပြည်မှာ တစ်ကြိမ်ပဲ ဖွင့်ခဲ့တယ်။ အဲဒီမှာ ကျွန်တော်နဲ့ အတူ တက္ကသိုလ်အေးမြင့် (ဓာတ်ပုံ)၊ နောက် သူ့အမျိုးသမီး၊ မိတ်ကပ်နုနုယဉ်၊ ဓာတ်ပုံ စိုင်းဘုဏ်းထူး နဲ့ သူ့ဇနီး ဖြူဖြူညွန့်တို့နဲ့ ကျောင်းနေခဲ့ကြ တယ်။
ဆယ်တန်း အောင်ပြီးတော့ ကျွန်တော် အိမ်ထောင်ကျတယ်။ အိမ်ထောင်ကျတဲ့အတွက် ဗိုလ်တထောင် လုပ်သားများကောလိပ်မှာ ပြောင်းတတ်တယ်။ ကောလိပ်မှာ ကျွန်တော် ရှုပဗေဒ အဓိက။ ဘွဲ့ရတာ ၁၉၇၉ မှာ ဘွဲ့ရတယ်။ ဘွဲ့ရဖို့ ၅ နှစ် တက်ရတယ်။ B.Sc(Physics)နဲ့ ကျွန်တော် ဘွဲ့ရခဲ့တယ်။

အဲဒီလုပ်သားကောလိပ်မှာ တက်နေတဲ့ ကာလမှာပဲ ၁၉၇၇-၇၈ လောက်မှာ စစ်ပြန်မဂ္ဂဇင်းက စပြီး ထူထောင်တယ်။ ကျွန်တော့်ဆရာ ဦးမြလှိုင်၊ ဗိုလ်မှူးကြီး စောမြင့်၊ သူတို့ ဦးစီးပြီး ထူထောင်တာပေါ့။ အဲဒီမှာ ကျွန်တော့်ကို အလုပ်သင်အယ်ဒီတာအဖြစ် ဆရာဦးမြလှိုင် က ခေါ်ထားတာ။ အဲဒီမှာ စပြီးတော့ ဒီပုံနှိပ်လောက နဲ့ မဂ္ဂဇင်းလောကထဲကို ထဲထဲဝင်ဝင် ရောက်တယ်။ အဲဒီမှာတော့ အကုန်ပေါ့ဗျာ။ အလုပ်သင် အယ်ဒီတာ ဆိုပေမယ့် တောက်တိုမည်ရတွေပါ အကုန်လုပ်ရပါတယ်။ ကျွန်တော်နဲ့အတူ ကိုသုခပေါ့။ အခု ပြည်သူ့ခေတ်ဂျာနယ်မှာ တိုက်အုပ် လုပ်နေတဲ့သူ။ သူနဲ့ ကျွန်တော် အလုပ်သင်အဖြစ် အတူတူ လုပ် ရပါတယ်။ ကျွန်တော်တို့ အထက်မှာ ဆရာ ဦးခင်မောင်မြင့်၊ မဟေသီ ဦးခင်မောင်မြင့်ပါ။ အခုတော့ ဆုံးသွားပါပြီ။ နောက် ... ဆရာ ဦးအောင်မြင့်(ဖျာပုံနီလုံဦး)ပေါ့။

နောက် ... တခြား အလုပ်သင် အယ်ဒီတာတွေလည်းရှိတယ်။ ဒီထဲမှာ စွဲစွဲမြဲမြဲ ကျန်ခဲ့တာက ဦးခင်မောင်မြင့်၊ ကိုသုခ၊ ကိုအောင်မြင့်၊ ကျွန်တော်ပဲ ကျန်ခဲ့တာ။ ဦးမြလှိုင် လက်ထွက်တွေပေါ့။ ဒီလေးယောက်ကတော့ တစ်လျှောက်လုံး မဂ္ဂဇင်း အယ်ဒီတာတွေအဖြစ်ပဲ ရှိနေခဲ့ကြပါတယ်။ အခုချိန်အထိ ကျွန်တော်နဲ့ ကိုသုခ က မဂ္ဂဇင်း အယ်ဒီတာတွေ အဖြစ် ရှိနေသေးတယ်။ ဦးခင်မောင်မြင့်က ဆုံးသွားပြီး။ ကိုအောင်မြင့် ကတော့ နိုင်ငံရေးနယ်မှာရှိနေတယ်။ စစ်ပြန်မဂ္ဂဇင်းက အဲဒီတုန်းက အခါအားလျော်စွာ ထုတ်တဲ့ မဂ္ဂဇင်းပဲ ရှိသေးတယ်။ တင်ထုတ်မဂ္ဂဇင်းပေါ့။ မဂ္ဂဇင်းကို မထုတ်ခင်မှာတင်၊ တင်ပြီး ခွင့်ပြုချက်ရမှ ပုံနှိပ်ပြီး ထုတ်တဲ့ မဂ္ဂဇင်း။ အဲဒီကာလကရှိတဲ့ မဂ္ဂဇင်း တွေပေါ့။
စစ်ပြန် စစ်မှုထမ်းဟောင်းများအဖွဲ့က အဲဒီကာလကစပြီး ဖွဲ့တဲ့အချိန်၊ စစ်ပြန် စစ်မှုထမ်းဟောင်း များအဖွဲ့က မဂ္ဂဇင်း ထုတ်မယ် ဆိုပြီးတော့ စစ်မှုထမ်းစာရေးဆရာကြီးတွေက ဦးဆောင်ပြီး လုပ်တဲ့ မဂ္ဂဇင်း၊ ဗိုလ်မှူးကြီး ဟောမြင့် ပါတယ်။ ဦးမြလှိုင် ပါတယ်။ အဓိက လုပ်ရတဲ့ နာယက အယ်ဒီတာချုပ်တွေပေါ့။ ကျွန် တော်တို့က အလုပ်သင်အယ်ဒီတာအဖြစ်နဲ့ သွားရတယ်။ အဲဒါ ပထမဆုံး မဂ္ဂဇင်း အယ်ဒီတာအဖြစ် လုပ်ရတဲ့ အလုပ်ပါ။

စာတည်း။      ။ ဆရာ့ဖေဖေ ကျားဘညိမ်းနဲ့ ဆရာ လက်ဝှေ့နယ်မှာ ၀င်ဖူးတယ်လို့လည်း ဖတ်ရတယ်။ အဲဒီလက်ဝှေ့လောက အတွေ့အကြုံလေးတွေ မှတ်မိသလောက် ပြောပြပေးပါဦး ဆရာ။

ဆရာမျိုးမြင့်ညိမ်း။       ။ ကျွန်တော်တို့ ညီအစ်ကိုတွေက ငယ်ငယ်ကတည်းက လက်ဝှေ့လောကနဲ့ မဝေးဘူးပေါ့။ လက်ဝှေ့ကြိုးဝိုင်းဘေးမှာ မွေးပြီး ကြိုးဝိုင်းဘေးမှာ နေခဲ့ရတယ်။ တကယ်လည်း လက်ဝှေ့ ကြိုးဝိုင်းဘေး မှာနေခဲ့ရပါတယ်။ လက်ဝှေ့ကြိုးဝိုင်းဘေးမှာပဲ စား၊ အိပ်၊ ကျွန်တော်တို့ နေခဲ့ရဖူးတယ်။ အဖေက ရန်ကုန်မှာ ခဏတစ်ဖြုတ် နေရတဲ့ ကာလတွေ ရှိခဲ့ဖူးပါတယ်။ အဲဒါက ၁၉၅၈ ... ၅၉ လောက်ဖြစ် မယ်။ သိပ်တော့ မမှတ်မိပေမယ့် တကယ်ကို လက်ဝှေ့ကြိုးဝိုင်းနံဘေးမှာ နေခဲ့ရဖူးပါတယ်။ လက်ဝှေ့ဆို တာကျွန်တော် တို့အတွက် သိပ်မစိမ်းဘူး။ ငယ်ငယ်ကတည်းက ယဉ်ပါးခဲ့ဖူးတော့ ထိုးတယ်၊ ကြိတ်တယ်ဆို တာ ကျွန်တော်တို့အတွက် သိပ်မထူးဆန်းဘူး။ ဘာဖြစ်လို့လဲဆိုတော့ မြင်ဖူးနေတာ။ ကျွန်တော်တို့ အဖေက ကျွန်တော်တို့နဲ့ ကစားတယ်ဆိုရင် အိမ်မှာ လက်ဝှေ့ထိုးပြီးပဲကစားတယ်။

လက်အိတ်စွပ်ပြီး သူ့ကို ထိုးခိုင်း၊ သူကရှောင်တိမ်းပြီး တစ်ချက်နှစ်ချက် ပါးတွေ ထိပ်တွေ ပုတ်လိုက်၊ ခေါင်းပုတ်လိုက်ပေါ့။ ကြောင် ကဝကက်ကို ကစားသလိုမျိုး ကစားတာ။ ကျွန်တော်တို့ ညီအစ်ကိုတွေရော၊ ညီမတွေရော လက်ဝှေ့ကောင်းကောင်းကစားတာ သိပ်တော်တယ်။ အဲဒီလိုပဲ ကျွန်တော် တို့ နေကြတဲ့အခါကျတော့ ကျွန်တော်တို့အတွက် ဘာမှ မဆန်းဘူး။ ငယ်ငယ်ကတည်းက ကျွန်တော် တို့ ညီအစ်ကိုတွေအားလုံး ဘောလုံးမကန်ဘူး၊ ဂျင်မပေါက်ဘူး၊ စွန် မလွှတ်တတ်ဘူး၊ ဂေါ်လီ မပစ်တတ်ဘူး။ သားရေကွင်း မပစ်တတ် ဘူး။ ကျွန်တော်တို့ ကစားစရာက လက်ဝှေ့ပဲရှိတယ်။

ဘာကြောင့် လည်း ဆိုတော့ အဖေက အဲဒီအချိန်က စာလည်း ရေးနေတဲ့ ကာလဖြစ်တော့ အိမ်မှာက စာအုပ်တွေ လည်း တအားများတယ်။ ငွေတာရီတို့၊ ရှုမ၀တို့ ရှိတယ်။ ၁၉၆၀ ၀န်းကျင်ကာလပေါ့။ စာအုပ်တွေ တော်တော်များများ ရှိတယ် ဆိုတော့ အိမ်မှာ စာဖတ်ရင် ဖတ်၊ ကျောင်းစာဖတ်၊ မဂ္ဂဇင်းဖတ်ရင် ဖတ်၊ အိမ်မှာ အဓိကစာဖတ်တာပေါ့။ အဖေကလည်း အားပေးတယ်။ အမေကလည်း စာဖတ်တယ်။ အမြဲ စာဖတ်တယ်။ အိမ်မှာ ကျွန်တော်တို့ ထောင့်တစ်ထောင့်စီမှာ တစ်ယောက်မဟုတ် တစ်ယောက် စာဖတ်နေ ကြတာချည်းပဲ။ အပြင်ထွက်ပြီး ဆော့တာ၊ ကစားတာ သိပ်မရှိဘူး။

ကျွန်တော်တို့ ၁၁၀ လမ်းမှာ နေကြတုန်းက ကျွန်တော် မှတ်မိတယ်။ အဲဒီတုန်းက ကျွန်တော် သုံးတန်းကျောင်းသားပဲရှိလိမ့်ဦးမယ်။ ကိုးနှစ်၊ ဆယ်နှစ်သားလောက်ဖြစ်မယ်။ အဲဒီတုန်းက ကစားလို့ရှိရင် ကျွန်တော် တို့က လက်ဝှေ့အိတ်ကိုင်ပြီးတော့ အိမ်ပေါ်က ဆင်းသွားပြီး ရွယ်တူတွေနဲ့ လက်ဝှေ့အိတ်စွပ်ပြီး ထိုးကြတာပဲ။ ပထမတော့ ရပ်ကွက်ထဲက အထူးအဆန်းဖြစ်ပြီး သူတို့သားတွေ လက်ဝှေ့ထိုးကြတယ် ဆိုပြီး သဘောကျကြတာပေါ့။ နောက် ကြာလာတဲ့အခါကျတော့ ဒီကလေးတွေက ကျွန်တော်တို့ ထိုးတဲ့ဒဏ် မခံ နိုင်တော့တဲ့ အခါ ကျွန်တော်တို့ လက်ဝှေ့အိတ်ကိုင်ပြီး ဆင်းလာတာနဲ့ သူတို့ မိဘတွေက ဖိုးထောင်ရေ ... လာ အိမ် လာခဲ့၊ စာကျက်၊ ဘာ ညာနဲ့ပေါ့ဗျာ။ ဟေ့ ... သံချောင်းရေ ပြန်လာခဲ့တော့ ... ဆိုတာမျိုး။ ကျွန်တော် တို့မှာ ကစားဖော်မရှိတော့ဘူး။ ကျွန်တော်တို့ လက်ဝှေ့အိတ်ကိုင်ပြီး ဆင်းလာတာနဲ့ လမ်းထဲက ကလေးတွေ က ကြက်ပျောက်၊ ငှက်ပျောက် ပျောက်ကုန်ရော။

သူတို့ မိဘတွေက သူတို့ ကလေးတွေ နာမှာ စိုးတော့ ပေးမထိုးတော့ဘူး။ ကလေးတွေကတော့ ထိုးချင်တယ်။ ကျွန်တော် နာမည်တွေ မှတ်မိသေးတယ်။ ဖိုးထောင်တို့၊ သံချောင်းတို့။ လူတွေတော့ မမှတ်မိတော့ဘူး။ သူတို့ မရှိတော့ဘူး။ လူစုလို့မရတော့ဘူး ဆိုရင် ကျွန်တော်တို့ ညီအစ်ကိုချင်း ထိုးတယ်။ ကျွန်တော့် အထက် ကိုရဲနဲ့ ကျွန်တော် ဘက်ရှိတယ်။ ကျွန်တော့်ညီမ နှစ်ယောက်လည်း ဘက်ရှိတယ်။ ကျွန်တော့်ညီ အငယ်ဆုံး နှစ်ယောက်က ငယ်သေးတော့ မပါသေးဘူး။ ကျွန်တော် တို့ မောင်နှမ လေးယောက်ပေါ့။ ကိုဝင်းငြိမ်းနဲ့ ကိုဆန်နီက မန္တလေးမှာ နေကြတော့ မပါဘူး။ နောက်ပိုင်း ကျတော့မှ ကိုဆန်နီက ရန်ကုန် ရောက်လာတာ။

ကျွန်တော်တို့ အဲဒီလို ကစားကြတာ ဆိုတော့ အဲဒီလို နေရာကနေ မန္တလေးကို ပြန်ပြောင်းရတယ်။ ကျွန်တော်တို့ နေရာနဲ့ ဆွေမျိုးတွေ နေတဲ့ နေရာက နည်းနည်းဝေးတယ်။ ညီအစ်ကို မောင်နှမ ၀မ်းကွဲတွေ ရှိတဲ့နေရာက အခုအခေါ်ချမ်းအေးသာစံပေါ့။ ၈၃ လမ်းနားမှာ နေတာ။ ကျွန်တော်တို့ ဦးလေးနဲ့ ညီအစ်ကို ၀မ်းကွဲတွေနေတယ်။ အဲဒီမှာ သွားသွားကစားရတာ။ ကျွန်တော်တို့ နေတာက "မြို့ဂုဏ်ရောင်" ရုပ်ရှင်ရုံနား မှာ နေတာ။ မြို့ဂုဏ်ရောင်ကနေ အဲဒီကို တစ်မိုင်လောက် လမ်းလျှောက်ရတယ်။ ကလေးဘ၀က ကစားချင်တာ တစ်မိုင်လောက် လမ်းလျှောက်သွားရတယ်။ သူတို့က လက်ဝှေ့ကို ၀ါသနာမပါဘူး။ ကြက် တောင်ရိုက်တယ်။ ဘောလုံးကန်တယ်။ ခြံဝင်းနဲ့ဆိုတော့ စက်ဘီးစီးတယ်။ ဂီတာတီးတယ်။ စန္ဒရားတီးတယ်။ အဲဒီလိုမျိုးဆိုတော့ သူတို့က အနုပညာရှင်တွေ ဖြစ်နေတယ်။ ညီအစ်ကို တွေပါပဲ။ အစ်မ ရှိတယ်။ အစ်ကိုရှိတယ်။

 အစ်မက စန္ဒရားတီးတယ်။ အစ်ကိုက အကော်ဒီယံတီးတယ်။ ညီနှစ်ယောက်က တစ်ယောက်က ဂီတာတီးတယ်၊ တစ်ယောက်က စန္ဒရား တီးတယ်။ ကျွန်တော်တို့နဲ့ သိပ်လိုက်လျောညီ ထွေမဖြစ်ဘူး။ သူတို့က အနုပညာသမားတွေ။ နေတာ ထိုင်တာက ကြော့ ကော့နေတယ်။ ကျွန်တော်တို့က ငတေပုံစံမျိုးတွေ။ အဲဒီတော့ ... ဟိုမှာ သိပ်ဆော့စရာမရှိဘူးပေါ့။ သူတို့နဲ့ ဆော့ရင်လည်း ဆော့ပေါ့။ မဆော့ရင် ကျွန်တော့် ဦးလေးက အဲဒီမှာ ပုံနှိပ်တိုက်ရှိတယ်။ ချစ်ညိုပုံနှိပ်တိုက်ဆိုတာ ဟိုတုန်းကတော့ နာမည်ကြီးပေါ့။ အဲဒီတုန်းက မန္တလေးမှာ လူထုနဲ့ ချစ်ညို ပုံနှိပ်တိုက်ကြီး နှစ်တိုက်ပဲရှိတယ်။ လူထုလောက် တော့ မကြီးဘူးပေါ့။ အဲဒီကာလက မြန်မာပြည်မှာ အကြီးဆုံး ပုံနှိပ်တိုက်ကြီးတွေပါ။ Pain Chain လို့ ခေါ်တဲ့ စက်တွေ။ လူထုတိုက်နဲ့ ကျွန်တော့် ဦးလေး တိုက်မှာပဲရှိတယ်။ ဆိုက်ကြီးတွေ ရိုက်တာ။ Double Crown  တွေရိုက်တဲ့ စက်တွေပါ။

အဲဒီစက်ကြီးတွေ ထားတဲ့ ခြံဝင်းထဲမှာ စက်ကြီးက အကြီးကြီးရှိတဲ့အပြင် နောက်ထပ် စက်အသေးက ငါးလုံးလောက် ရှိတယ်။ နောက် ဓားစက်တွေရှိတယ်။ စာအုပ်ချုပ်တဲ့ နေရာရှိတယ်။ တစ်မိုး တည်းအောက်မှာပဲ အပြီးလုပ်တဲ့ နေရာတွေပေါ့။ ကျွန်တော်တို့ ရောက်သွားတဲ့အခါ စောစောက ဓားစက် ဖြတ်တဲ့ဘေးမှာ စက္ကူပုံတွေရှိတယ်။ စက္ကူဖြတ်စတွေထဲမှာ နပန်းလုံးတယ်။ တူတူပုန်းတယ် စသဖြင့်ပေါ့။ ကစားနည်းမျိုးစုံ ကစားကြတယ်။ အဲဒီကနေပြီးတော့ ဘာကို ကျွန်တော်သွားပြီး စိတ်ဝင်စား သလဲဆိုတော့ စာစီနေတဲ့သူတွေ၊ ခဲစာလုံးစာစီတာကို ကြည့်ပြီး ကျွန်တော်တို့က စာကို ဖတ်တတ်ခါစ ဆိုတော့ ဒီစာကို ပြောင်းပြန်စီတာကို ကြည့်ပြီး သဘောကျတယ်။ စိတ်ဝင်စားတယ်။ သူ ပြောင်းပြန်စီတာက ပုံနှိပ်စက်ထဲရောက်ရင် အတည့်ဖြစ်သွားတာကိုး။ သူတို့ စာပြောင်းပြန် ဘယ်လို ဖတ်သလဲဆိုတာ ကျွန်တော် စိတ်ဝင်စားသွားတယ်။ သူတို့ စာစီနေတဲ့ဘေးမှာ ရပ်ပြီး ကျွန်တော် ငေးကြည့်နေတယ်။ သူတို့ကို မေးလို့လည်း မဖြစ်ဘူး။ သူတို့ အလုပ်လုပ်နေတာမို့ မေးလည်း တစ်ခွန်းစ၊ နှစ်ခွန်းစပဲ ဖြေတယ်။ စိတ်ရှည် လက်ရှည် ရှင်းမပြဘူး။ ဒါကို ဘယ်လို လုပ်တာလဲဆိုတာ ကျွန်တော် နားလည်အောင် ဆိုပြီး အဲဒီကတည်း က စိတ်ဝင်စားခဲ့တယ်။

စာတည်း။     ။ သူတို့မှာ လင်္ကာရှိတယ် မဟုတ်လား ဆရာ။

ဆရာမျိုးမြင့်ညိမ်း။     ။ လင်္ကာတော့ မဟုတ်ဘူး။ သူတို့မှာ စာစီခွက်ရဲ့၊ အခုခေတ်လို ပြောရရင် လက်ကွက် ပေါ့။ ခ၊ ခုံ၊ ခု၊ ခံ ... ကျွန်တော် သိပ်တော့ မမှတ်မိဘူး။ အဲဒီလို အစဉ်လိုက်၊ အစဉ်လိုက် ဇယား ကွက်တွေ ရှိတယ်။ အခုတော့ ကျွန်တော် မေ့နေပြီ။ အရင်တုန်းက ကျွန်တ်ေလည်း ကျက်ခဲ့ဖူးတယ်။

ဆိုတော့ ... အဲဒါလေးတွေကို သူတို့က ရနေတော့ ဘယ်နား လှမ်းနှိုက်လိုက်၊ နှိုက်လိုက် လိုချင်တဲ့ စာလုံး ပါလာတယ်။ ကွမ်းတ၀ါးဝါး၊ စကားတပြောပြောနဲ့ စာစီနေတာ ကျွန်တော် သိပ်သဘောကျတယ်။ သူတို့ လစ်တာ နဲ့ သူတို့ ထမင်းစားချိန်၊ လက်ဖက်ရည်သောက်ချိန်မှာ ခဲစာလုံးတချို့ ကျွန်တော် ရအောင်ယူ ထားတယ်။ ယူပြီးတော့ ကိုယ့်ဟာကိုယ် လုပ်ကြည့်တယ်။ ကိုယ့်နာမည် ရအောင်စီကြည့်တယ်။ မရဘူး။ ကျွန်တော် လုပ်တာ အလွဲလွဲအချော်ချော် ဖြစ်ကုန်တယ်။ ဥပမာ ... ခခွေးနဲ့ ယပင့်က သီးခြားရှိတယ်။ ခခွေးနဲ့ နသတ် က သီးခြားရှိတယ်။ စာလုံးစီပုံစီနည်းတွေ ကျွန်တော်မှ မသိဘဲ။ ကျွန်တော် စီလို့မရဘူး။ စီလို့ရအောင် ကြိုးစားရင်း ကြိုးစားရင်းနဲ့ နောက်တော့ သဘောပေါက်လာတယ်။ စီလို့ရအောင် ကြိုးစားရင်း ကြိုးစားရင်း နဲ့ နောက်တော့ သဘောပေါက်လာတယ်။ ဒီစာစီတာ ဘယ်လိုလဲဆိုတာပေါ့။ သိလာတဲ့အခါ ကိုယ့် နာမည်ကို ပထမဆုံး ရအောင်စီကြည့်။

ကိုယ့်အတန်းနာမည်၊ ကိုယ့်ကျောင်းနာမည်ကို စီပြီး အဲဒါကို သားရေကွင်းနဲ့ချည်ပြီး၊ ရာဘာစီး သဘောမျိုး ကျွန်တော့်ကျောင်းစာအုပ် မှာ အဲဒါကို တံဆိပ်ရိုက်တယ်။ ကျွန်တော့် ကျောင်းစာအုပ်တွေဆိုရင် ခဲစာလုံးနဲ့ စီထား တဲ့ ကျွန်တော့်နာမည်၊ အတန်းနာမည်၊ ကျောင်း နာမည်တွေချည်းပဲ။
အဲဒီမှာ ကျွန်တော် ပုံနှိပ်တာကို စိတ်ဝင်စားလာတာ။ ပြီးတော့ စက္ကူလက်ထိုးစက် ဆိုတာလည်း ရှိ သေးတယ်။ အခုခေတ်လို အော်တိုမက်တစ် လေနဲ့စုပ်ပြီးတော့ စက်ထဲ ထိုးထည့်တဲ့ စက်မျိုးမဟုတ်ဘူး။ ဘယ်ဘက် လက် က စက်ထဲက စက္ကူကို ဆွဲထုတ်ပြီးလို့ရှိင် ညာဘက်လက်က စက္ကူကို စက်ထဲကို ထည့်ရ တယ်။ လက်နှစ်ဖက် က အဲဒီလိုမျိုး၊ ဒီဘက်က ထုတ်ရင် ဟိုဘက်ကထည့်၊ အဲဒီလို သွားနေရတယ်။ အဲဒါ ကျွန်တော် သဘောကျတယ်။ ကိုယ်ကလည်း စက်ဘီးနင်းတတ်ခါစကိုး။ ဒီတော့ စက်ရဲ့ သဘောတရားကို ကျွန်တော် နားလည်သွားတယ်။ ကိုယ်တိုင်တော့ ၀င်လုပ်ခွင့်မရပါဘူး။

 နောက်တစ်ခု ကျွန်တော် မှတ်မိနေတာက ဒီခဲစာလုံးတွေ ချစ်တာကိုပါ။ ကျွန်တော်တို့ ငယ်ငယ် တုန်းက အခုခေတ်လို လေယာဉ်ပျံတို့၊ ဘာတို့ပေါ့လေ။ ဓာတ်ခဲနဲ့ လေယာဉ်ပျံတို့၊ ရီမုဒ်နဲ့ လေယာဉ်တို့ ကျွန်တော်တို့ ခေတ်တုန်းက မရှိဘူး။ ရေခဲခြစ်တုတ်လေးရဲ့ ထိပ်မှာ ကတ်ပြားနှစ်ခုနဲ့ ညှပ်ပြီးတော့ ရှေ့မှာ အလေးလေးတစ်ခု ထည့်ရတယ်ဗျ။ အဲဒီအလေးလေးက ကျွန်တော့်ဦးလေ ပုံနှိပ်တိုက်က နှိုက်နှိုက်လာတဲ့ ခဲစာလုံးလေးတွေဆို အရမ်းကို တန်ဖိုးရှိတယ်။ အဲဒီခဲစာလုံးတွေနဲ့ဆို အများကြီး အလုပ်ဖြစ်တယ်။ ကျွန်တော် အဲဒီခဲစာလုံးလေးတွေကို အခုထိ မှတ်မိနေသေးတယ်။ ခဲစာလုံးလေးတွေ မြင်တိုင်း သြော် ... ငါ ငယ်ငယ်တုန်း က ဦးလေးပုံနှိပ်တိုက်က ခဲစာလုံးလေးတွေ နှိုက်နှိုက်ပြီး လေယာဉ်ပျံ လုပ်ခဲ့ဖူးပါလားဆိုပြီး သွား သွား သတိရတယ်။ ခဲစာလုံးတွေကို အဲဒီလို ချစ်တယ်။ အဲဒီကတည်းက နေပြီးတော့ ပုံနှိပ်လုပ်ငန်းကို စိတ်ဝင်စား တယ်။

တကယ်ကို ထဲထဲဝင်ဝင် လေ့လာတယ်။ အဲဒီလို လေ့လာရင်းကနေ ကြုံရင်ံကြုံသလို လေ့လာရင်းနဲ့ အခု နောက်ဆုံးကျတော့ စာအုပ်တစ်အုပ်လုံးကို ကျွန်တော် Operate လုပ်နိုင်လာတယ်။ ပုံနှိပ်လုပ်ငန်းကို ကျွမ်းကျွမ်းကျင်ကျင် လုပ်နိုင်လာတယ်။ ကျွမ်းကျင်သွားတဲ့ သဘော။ ဒီဟာကို ကျွန်တော် အရမ်း စိတ်ဝင်စားတာ ကိုး။ ပုံနှိပ်ထုတ်လုပ်ရေးလုပ်ငန်းကို စိတ်ဝင်စားတယ်။ အဲဒီလိုပဲ Art Work ကို စိတ် ၀င် စားတယ်။ ပိုပြီးတော့ လေ့လာတယ်။ ပြန်ကြည့်လို့ရှိရင် တွေ့မှာပါ။ ကျွန်တော် စစ်ပြန်၊ ပေဖူးလွှာ။ နောက် ... ရွှေအမြုတေတို့၊ teen တို့မှာ Art Work တွေက ကျွန်တော် လုပ်တာပါ။ ဒီ Art Work တွေကို ကျွန်တော် ကိုယ်တိုင်ပဲ Layout လုပ်တယ်။ ကွန်ပျူတာခေတ်မှာလည်း ကျွန်တော့် Assistant တွေကို သင် ပေးထားတယ်။ ကျွန်တော် Pass မလုပ်ဘဲနဲ့ ဒီဇိုင်းတွေကို ထုတ်လို့မရဘူး။ ဒါက ငယ်ဘ၀ကစလို့ ရခဲ့တဲ့ အတွေ့အကြုံတွေပေါ့။

ငယ်ဘ၀မှာ နောက်ထပ် ဘာတစ်ခု သွားသတိရသလဲဆိုတော့ စာဖတ်တာပေါ့။ အမေက အရမ်းစာ ဖတ်တယ်။ အဖေလည်း ဖတ်တယ်။ အမေက မြန်မာစာဖတ်ပြီး အဖေက အင်္ဂလိပ်စာဖတ်တယ်။ အဖေ့စာအုပ်ပုံကလည်း အဲဒီတုန်းက စာအုပ်ဗီရိုတွေ ဘာတွေ မရှိပါဘူး။ အိမ်မှာက ဗီရိုတို့၊ ဘာတို့နဲ့ စာအုပ် မထားနိုင်ဘူး။ စာအုပ်တွေကို ထင်းရှူးသေတ္တာပုံးတွေနဲ့ ထည့်ပြီး အဲဒါတွေ က နို့ဆီသေတ္တာ၊ နို့မှုန့်သေတ္တာ တွေ၊ ထင်းရှူးပုံးတွေပေါ့။ အဲဒါတွေနဲ့ စာအုပ်ထည့်ပြီး ထင်းရှူးပုံးတွေကို ဆင့် ထားတယ်။ အများကြီး ဆင့်ားရတယ်။ ကျွန်တော် မှတ်မိသလောက် သေတ္တာတွေ သုံးလေးဆယ်လောက် အနည်းဆုံး ရှိတယ်ဗျ။ ဒါက သေတ္တာနဲ့ ထည့်ထားတာတွေ။ သေတ္တာထဲ မထည့်ဘဲ အထပ်လိုက် ပုံထားတာတွေလည်း ရှိတယ်။ အဲဒီလိုပဲ အများကြီးပဲ။ ကျွန်တော့်အဖေက စာရေးတဲ့အခါကျလို့ရှိရင် သူက များသော အားဖြင့် လက်ဝှေ့ အကြောင်းတွေ ရေးတာ။ အဲဒီခေတ်က မြ၀တီတို့၊ ရှုမ၀တို့မှာ လက်ဝှေ့ဆောင်းပါးတွေ ရေးတယ်။ ဂျာနယ် တွေမှာလည်း ရေးတယ်။

သူက ရေးလို့ရှိရင် reference တွေ ရှာရတာဆိုတော့ ကျွန်ော့်ကို ရှာခိုင်းတယ်။ မင်းကွာ ... သေတ္တာထဲက ဘယ်စာအုပ်ထဲ မှာ ရှာစမ်းဆိုပြီးတော့ သူက မျက်နှာဖုံးပုံပဲ ပြောလိုက်တာ။ ''ရော့ဘီမာစီယာနိုး''၊ ဒါမှမဟုတ် ''ဖလွိုက်ပက်တာဆန်''၊ ဒါမှမဟုတ် ''မိုဟာမက်အလီ''။ ဘယ်သူနဲ့ ဘယ်သူနဲ့ ထိုးနေတဲ့ပုံကွာဆိုရင် ကျွန်တော် ရှာပေးရတယ်။ အဲဒါကို နှစ်တန်းကျောင်းသားလောက်ကတည်း ကလုပ်ပေးရတာမို့ ကျွန်တော် မှတ်မိနေတယ်။ နောက်တစ်ခု ကျွန်တော့် အဖေက စာရေးလို့ရှိရင် နည်းနည်း ခမ်းနားတယ်။ ခမ်းနားတယ် ဆိုတာ စားပွဲ၊ ကုလားထိုင်နဲ့ရေးတာကို ပြောတာ မဟုတ်ဘူး။

သူ့ရဲ့ Works ကို တော်တော်ကြီး ဂရုစိုက်လုပ်တယ်။ အဲဒီတုန်းက စာရေးစားပွဲတွေ ဘာတွေ ကျွန်တော်တို့ အိမ် မှာ မရှိဘူး။ ထမင်းစား စားပွဲကို ခင်းပြီးလို့ရှိရင် အဲဒီဘေးမှာ သူ လိုချင်တဲ့ စာအုပ်တွေ ကို ဖြန့်ချ ထားလိုက်တယ်။ ခေါက် ထား၊ မှောက်ထားပြီးလို့ရှိရင် ကျွန်တော် ဘေးမှာ စောင့်ကြည့်နေတာမို့ သိတယ်။ သူက စာရေးပြီဆိုရင် စာအရင်မရေးဘူး။ Illustration အရင်ရေးတာ။ ကျွန်တော့်အဖေက ပန်းချီလည်း ဆွဲတယ်လေ။ အဲဒီအခါ ကျတော့ ဆောင်းပါး သရုပ်ဖော်ပေါ့။ ဥပမာ - ဖလွိုက်ပက်တာဆန်အကြောင်းဆိုရင် ဖလွိုက်ပက်တာဆန်ပုံ ကိုအရင်ရေးတယ်။ အဲဒါကို သူက တရုတ်မင်တောင့်၊ တရုတ်ဆေးတောင့် နဲ့ ကျောက်ပြားမှာ သွေးပြီး ရေး ရတာ။ အဲဒါကို ရေးပြီးလို့ရှိရင် ကွန်ပါနဲ့ဝိုင်းမယ်၊ စာလုံးဝိုင်းမယ်။ ဖလွိုက်ပက်တာဆန် ပုံရေးမယ်။ ရေးပြီးလို့ ရှိရင် မှောက်ကြည့်လိုက်၊ လှန်ကြည့်လိုက်၊ ထောင်ကြည့်လိုက် ကြည့်တာ။ အဲဒီ Mood ကိုအရင်သွားတာ။ ပြီးတော့မှ ရေးတာ။

ကျွန်တော်က အဲဒီအချိန်မှာလည်း လက်ဝှေ့ကို စိတ်ဝင်စားနေပြီ။ ကစားချင်နေပြီ။ စာဖတ်တာကို လည်း စိတ်ဝင်စားတော့ အဖေ ရေးတာကို တစ်ရွတ်ပြီးတစ်ရွက် ယူဖတ်တယ်။ ကျွန်တော့်အဖေ လက်ရေးက ဆိုးတယ်။ တော်တော့်ကို ဆိုးတယ်။ ကျွန်တော့်ဦးလေးက ပြောတယ်။ ရှေးခေတ် မြေတိုင်း စာရေး လက်ရေးလိုပဲတဲ့။ ဒါပေမဲ့ ကျွန်တော့်အဖေ လက်ရေးကို တစ်လုံးမကျန် ကျွန်တော် ဖတ်တတ်တယ်။ နောက်ပိုင်း ကျွန်တော့်အဖေ စာအုပ်တွေ ပုံနှိပ်ထုတ်ဝေတဲ့အခါ ကျွန်တော့်အဖေ လက်ရေး ကို ကျွန်တော် ပရုဖ် သွားသွားဖတ်ပေးရတယ်။ ရေကျော်ထဲက ''စာအုပ်လုပ်ငန်း'' ပုံနှိပ်တိုက်မှာ ကျွန်တော် သွားဖတ်ပေးရတယ်။ ဆိုတော့ ... ကျွန်တော် နှစ်တန်း ကျောင်းသားလောက်မှာကတည်းက အဖေ စာရေး တာကို ကြည့်ပြီး စာရေးတာကို ကျွန်တော် စိတ်ဝင်စားခဲ့ပါတယ်။ အဖေ့အပေါ်မှာ စိတ်ဝင်စားမှု ရှိတဲ့အတွက် အဖေ့ရဲ့လွှမ်းမိုးမှု ကျွန်တော့်အပေါ်ရှိတယ်။ အဖေ့အပေါ် အထင်ကြီးတယ်။ အဖေ လုပ်တာကို စိတ်ဝင်စားတယ်။ အဖေလုပ်တာ လိုက်လုပ်ချင်တယ်။ အဖေ ဖြစ်စေချင်တ ကျွန်တော် လုပ်တယ်။ အဖေ ဖြစ်စေချင်တာဖြစ်အောင် ကျွန်တော် အမြဲကြိုးစားလေ့ရှိပါတယ်။

ဆိုပါတော့ ... ကျွန်တော့်ကို လက်ဝှေ့သမားအဖြစ်နဲ့ သူ မျှော်လင့်ထားတာရှိတယ်။ ငယ်ငယ်လေး ကတည်း က ကျွန်တော့်ကို လက်ဝှေ့သမား ဖြစ်စေချင်တယ်။ လက်ဝှေ့ထိုးစေချင်တယ်။ ကျွန်တော်တို့ ညီအစ်ကို မောင်နှမထဲမှာ သူက ကျွန်တော့်ကို လက်ဝှေ့နဲ့ ပတ်သက်ရင် အားအထားဆုံးပါ။ ကျွန်တော် မှတ် မိနေတာ၊ သုံးတန်း ကျောင်းသားတုန်းကပါ။ Body Weight က ပေါင် ၆၀ ရှိတယ်။ ကျွန်တော် ထင်တာ အဲဒီတုန်းက ကျွန်တော့်အသက် ဆယ်နှစ်ဖြစ်မယ်။ သုံးတန်း ကျောင်းသားမှာ ၀င်ထိုးရတာ။ မန္တလေးက မြို့တော်ခန်းမ မှာ ထိုးရတာ။ ပထမဦးဆုံးပွဲပဲ။ ကျွန်တော် ထိုးမယ်ဆိုတဲ့အခါကျတော့ ကျွန်တော့် အဖေရဲ့အဖေ ကလည်း အဲဒီပွဲကို လာကြည့်တယ်။ ကျွန်တော့်အဖေရဲ့ညီတွေလည်း လာကြည့်တယ်။ ကျွန် တော့်ဦးလေးတွေ... ကျွန်တော့်အဖေရဲ့လက်ဝှေ့မျိုးဆက် ပေါ်ပြီဆိုပြီး ကျွန်တော့်အဖေ ကို မြေတောင် မြှောက်ပေးကြတဲ့လူတွေအားလုံး လာကြည့်ကြတယ်။ စင်ပေါ်မှာ ပထမဦးဆုံး ထိုးတဲ့ပွဲ။ ကျွန်တော့် အဖေ အဝန်းအဝိုင်းက လူတွေအများကြီး လာကြည့်တယ်။ ကျားဘညိမ်း နောက်ထပ် မျိုးဆက်တစ်ဆက် ပေါ်ပြီ ဆိုပြီးတော့ပေါ့။ ကျွန်တော် အဲဒီတစ်ပွဲ ထိုးခဲ့ဖူးတယ်။

စစ်ကိုင်း က ကောင်လေးနဲ့ထိုးတာ။ သူက ဘုန်းကြီး ကျောင်းသားလေးပါ။ အဲဒီမှာ ကျွန်တော် နိုင်တယ်။ သုံးချီပွဲ။ အနောက်တိုင်း လက်ဝှေ့ပွဲပါ။ နိုင်တော့ အဖေ က အဲဒီညမှာ ငါ တိုင်းပြည်အပေါ်မှာ တင်ကျန်နေ တဲ့ ကြွေးတော့ ငါ့သားက ဆပ်လိမ့်မယ်ဆိုပြီး လက်ခ မောင်းခတ်တယ်။ မိသားစုကြားမှာလည်း ပြောတယ်။ ကျွန်တော့်အမေကိုလည်း သူ ပြောတယ်။ သူ ၁၉၅၂ ခုနှစ် ဟဲလ်ဆင်ကီး အိုလံပစ်ပွဲမှာ သွားထိုးတုန်းက ရှုံးသွားခဲ့တယ်။ အဲဒီတုန်းက မြန်မာပြည်မှာ အနောက် တိုင်းလက်ဝှေ့နဲ့ပတ်သက်ပြီးတော့ အထောက်အကူပြု ပစ္စည်းက သိပ်မရှိဘူး။ စတန်းဘော (Stand Ball) လိုဟာမျိုး၊ လက်ဝှေ့ထိုးတဲ့အခါ Speed တွေ ကို လေ့ကျင့်တဲ့ကိရိယာတွေ၊ အလေးတွေမရှိဘူး။ ကျွန်တော် တို့အဖေ ထိုးခဲ့တဲ့ဟာ သဲအိတ်ကြီး ကို ထိုးရတာပဲရှိတယ်။ လူလူချင်း ထိုးရတယ်။ ပင်ကို ပါရမီရှိတဲ့သူတွေ မို့ ကမ္ဘာ့စင်မြင့် အထိအောင် ရောက်သွားတာ။ တကယ်တမ်းကျတော့ ခေတ်မီနည်းပညာတွေ မရှိခဲ့ဘူး။ သူ့ဆရာ "ဘော်ဘီဖစ်ရှား" ဆိုတာ နိုင်ငံခြားဆရာပါပဲ။ သူတို့က စီစဉ်ပေးလို့ သင်ခဲ့ရတဲ့ပညာပဲရှိတယ်။ အဲဒီ လူတွေကလည်း ခေတ်ဟောင်း လက်ဝှေ့သမားကြီးတွေ။

အင်မတန် သိပ္ပံနည်းကျတဲ့ စနစ်တွေနဲ့ သင်ပေးခဲ့ တာမဟုတ်ဘူး။ နောက်ပြီးတော့ ဒီမှာလည်း အဲဒီကာလက သင်ထောက်ကူပစ္စည်းတွေက မရှိဘူး။ ဟိုမှာ ကမ္ဘာနဲ့သွားယှဉ်တဲ့အခါ ကိုယ့်ရဲ့သတ္တိနဲ့ ပင်ကိုပါရမီအရ သွားယှဉ် ခဲ့ရတာဆိုတော့ သူ လိုချင်တဲ့ အိုလံပစ် ရွှေတံဆိပ်ဆိုတာ မရဘူးပေါ့။ သူ့ခေတ်တုန်း က မြန်မာပြည်မှာ ပြိုင်ဘက်မရှိဘူး။ မရှိတော့ အိန္ဒိယ၊ သီဟိုဠ်က... အဲဒီလို နေရာတွေက လက်ဝှေ့ သမားတွေခေါ်ပြီးတော့ ကျွန်တော့်အဖေအတွက် ပြိုင်ပွဲတွေ လုပ်ပေးခဲ့ရတယ်။ အဖေ့ကို Promote လုပ်ပေးခဲ့ကြတယ်။ လက်ဝှေ့သမားက ပွဲမထိုးရရင် လက်ကျသွား တယ်။ လက်မကျသွားအောင် နိုင်ငံခြားက လက်ဝှေ့သမားတွေခေါ်ပြီး ထိုးခိုင်းခဲ့တယ် ကျွန်တော့်အဖေက အဲဒီလောက်အထိ ထိုးခဲ့တာပါ။ ဒီတော့ သူ့ကိုယ်သူလည်း အရမ်းမျှော်လင့်ထားတယ်။ မျှော်လင့်ထားပြီး တော့ အိုလံပစ်ကို သွားထိုးတဲ့အခါ ကွာတားဖိုင်နယ် မှာ ရှုံးတယ်။ ဒါဟာ သူ့အတွက် တိုင်းပြည်အပေါ် တင် ကျန်တဲ့အကြွေးပဲ။ အဲဒီအကြွေးကို သူ့သားက ပြန်ဆပ်နိုင်မယ်လို့ မျှော်လင့်ခဲ့တာပေါ့။ ဒါပေမဲ့ ကျွန်တော်က မဆပ်နိုင်ပါဘူး။ တကယ်တမ်း ကျတော့ ကျွန်တော်က လက်ဝှေ့သမားကောင်းတစ်ယောက် မဖြစ်သွားဘူး။ ကျွန်တော် လက်ဝှေ့ ကစားပါတယ်။ ကစားပြီးတော့ ၇၄ ခုနှစ်မှာ အိမ်ထောင်ကျတော့ ကျွန်တော် နားလိုက် ပါတယ်။

စာတည်း။ ။ဆရာ... ဆရာ ငယ်ငယ်တုန်းက ဆရာ့မေမေနဲ့ မန္တလေးကို ဆားကုန်ကူးရင်းနဲ့ လိုက်ခဲ့ဖူးတယ် လို့ ဆရာဝင်းငြိမ်းနဲ့ အင်တာဗျူးတုန်းက သိခဲ့ရပါတယ်။ အဲဒီအကြောင်းလေး နည်းနည်းပြောပြပေးပါဦး ဆရာ။

ဆရာမျိုးမြင့်ညိမ်း။ ။အဲဒါက အဲဒီကာလတုန်းက အဖေက အစိုးရဝန်ထမ်းဆိုတော့ ဝင်ငွေသိပ်မရှိဘူး။ လစာ နည်းတယ်။  ကျွန်တော်တို့ ညီအစ်ကိုမောင်နှမတွေက တဖြည်းဖြည်းနဲ့ အရွယ်ရောက်လာကြပြီ။ အရွယ် ရောက်လာပြီးတော့ အားလုံးကလည်း စားနိုင် သောက်နိုင်တဲ့သူတွေ၊ သန်မာထွားကျိုင်းကြတာ ဆိုတော့။ စားနိုင် သောက်နိုင်တဲ့ အရွယ်တွေ အပြိုင်းပြိုင်းဖြစ်လာတဲ့အခါကျတော့ အိမ်မှာ သိပ်မလုံလောက် ဘူးပေါ့။ မလုံလောက်တဲ့အခါကျတော့ အမေက သူ စီးပွားရေးလုပ်မယ်ဆိုပြီး သူကိုယ်တိုင် ဝင်လုပ်တယ်။ နဂိုတုန်း ကလည်း အမေက အိမ်မှာအလုပ်လုပ်ပါတယ်။ စက်ပန်းထိုးတာ၊ ဇာပန်းထိုးတာပါ။ အဲဒါ ကျွန်တော်တို့အမေ ငယ်ငယ်လေးကတည်းက လုပ်တာ။ ကျွန်တော်တို့ မှတ်မိတဲ့အရွယ်၊ နားလည်တဲ့အရွယ် အထိ အမေ က စက်ချုပ်၊ ဇာပန်းထိုးပါတယ်။

နောက်ပိုင်းကျတော့ ရန်ကုန် ရောက်တဲ့အခါ အမေ သိပ်မလုပ်တော့ဘူး။ ဒီမှာ လည်း အဲဒါက နည်းနည်းကော သွားတော့ မလုပ်ဖြစ်တော့ဘူး။ တဖြည်းဖြည်း စီးပွားရေးကျပ်တည်းလာတဲ့ အခါ အမေက သူလုပ်မယ် ဆိုပြီး အဖေ့ကို ခွင့်တောင်းပြီးလုပ်တယ်။ ပွင့်ပွင့်လင်းလင်း ပြောရရင် ကျွန်တော့် အမေ မှောင်ခိုပေါ့။ မှောင်ခို လုပ်ဖူးတယ်။ ပစ္စည်းတွေ သွားသယ်လာပြီးတော့ ပြန်ရောင်းတာ။ အဲဒါနဲ့ပတ် သက်ပြီး သူ စိတ်မကောင်းတာတစ်ခုပေါ်လာတယ်။ သူနဲ့ပတ်သက်ပြီးတော့ သူ့မိတ်ဆွေအမျိုးသမီးလေး တစ်ယောက် အဖမ်းခံရတော့ ဒီအလုပ်ကို သူ မလုပ်တော့ဘူးဆိုပြီး စွန့်လွှတ်လိုက်တယ်။

တခြားအလုပ် ကို ကျွန်တော့်အဖေက လိုက်ပြောပေးတာပေါ့။ ရေးဘက်မှာ ရှိတဲ့ ပလိုင်ကီးက ဆားလုပ်ငန်းရှင်၊ သူ့နာမည်က  ဦးဟန်တင်လား... ကျွန်တော် သိပ်မမှတ်မိဘူး။ အဲဒီပုဂ္ဂိုလ်ကြီးကို သွားပြောပေးတာ။ အဲဒီပုဂ္ဂိုလ်ကြီးက ဆားတွေကို အကြွေးရောင်းပေးတယ်။ အဲဒါတွေ မန္တလေးကို တင်ပို့ ရတယ်။ တစ်ပိဿာကို "ဆယ်ပြား" လောက် မြတ်တယ်။ တစ်ခေါက် တစ်ခေါက်သွားရင် ပိဿာ သောင်းရှစ်ထောင်၊ နှစ်သောင်းလောက်ကို မီးရထားနဲ့ တင်ပို့တာရှိတယ်။ ကားနဲ့တင်ပို့တာရှိတယ်။ အမေ့ ကို အကူအညီပေးခဲ့ဖူးတယ်။ နောက်ပိုင်းကျ တော့လည်း မလုပ်ဖြစ်တော့ဘူး။ ဘာကြောင့်မှန်းတော့ ကျွန်တော်လည်း မမှတ်မိတော့ဘူးဗျ။ သိပ်အလုပ် မဖြစ်တော့လို့ နေတယ်။ အမေနဲ့တော့ အဲဒါ လုပ်ဖူးပါတယ်။

ဆက်ရန်
.

No comments: