Wednesday, February 22, 2012

ဝင်းငြိမ်း နှင့် စာရေးဆရာများ ပေဖူးလွှာစာပေအင်တာဗျူး, အပိုင်း (၄၅)

(ဆရာကလည်း ဖလင်တွေ တော်တော် ဖြုန်းခဲ့တာပဲ။ မကြိုက် ပြန်ရိုက်၊ မကောင်းပြန်ရိုက် အဲဒီလို အလုပ် နဲ့ ကြိုးစားခဲ့တယ်။ ရုပ်ရှင်လောကမှာ သဘာဝကျကျနဲ့ ထူးထူးခြားခြား ထွက်လာနိုင်အောင် ကြိုးစား ခဲ့တယ်။ ဘာကြောင့် ကြိုးစားတာလဲဆိုတော့ အဲဒီအချိန်က စာပေနယ် မှာ " သာဓု" ဆိုတာ ထိတ်ထိတ်ကြဲ ဖြစ်နေ တဲ့ အချိန်။ အဲဒီလို ထိတ်ထိတ်ကြဲ ဖြစ်နေတဲ့ အချိန်။ အဲဒီလို ထိတ်ထိတ်ကြဲတဲ့ သာဓု ရုပ်ရှင် ရိုက်ရာမှာလည်း သူများအောက်က မနေဘူးဆိုပြီး ကြိုးစားခဲ့တာပဲ။ အဲဒါကြောင့် အကယ်ဒမီတွေ ရခဲ့ ကြတယ်။ မြတ်မွန် အကယ်ဒမီ ရတာကတော့ သူ့ရဲ့ ကြိုးစားမှု၊ ဆရာက ပြင်းပြင်းထန်ထန် သင်ပေးမှု တွေကြောင့် ရခဲ့တာ။) .. ကို ဆက်ဖတ်ရန်....

နောက်တစ်ခုက မင်းသားထွန်းဝေ အကယ်ဒမီနဲ့ ပတ်သက်ပြီး စဉ်းစားကြတော့ ပြဿနာပေါ်လာတယ်။ ကားနာမည် တော့ ဆရာ မေ့နေတယ်။ "ချစ်တော့ ချစ်တယ် " ထင်ပါရဲ့။ အဲဒီကားက မျိုးချစ် ရဖို့ သေချာ သလောက် ဖြစ်နေတဲ့အချိန်။ ဆရာက ဒီဇင်ဘာ ၂၃ ရက်မှာ ကပ်ပြီး ၀င်လိုက်တော့ အကယ်ဒမီစာရင်း ၀င် သွားတယ်။ မျိုးချစ်နဲ့ ထွန်းဝေ ယှဉ်ပြီး စဉ်းစားကြတယ်။ ထွန်းဝေ က သိပ်ကောင်း တယ်။ တစ်ဖက်က မျိုးချစ် ကလည်း ကောင်းတာပဲ။ ထိပ်တိုက် ဖြစ်နေရာမှာ အသေးစိတ် ပြန်ကြည့်ကြတော့ ထွန်းဝေ လုပ်ရတာ တွေက ခက်ခက်ခဲခဲတွေချည်းပဲ။ ဒါနဲ့ ထွန်းဝေ ရသွားတယ်။ သူ ရခဲ့တာက လွတ်လွတ် ကျွတ်ကျွတ် မဟုတ်ဘူး။ အကြိတ်အနယ် ယှဉ်ပြီးမှ ရခဲ့တာ။

ညီလေး တို့ မဂ္ဂဇင်းမှာ မပါ ပါအောင် ဂရုစိုက်ပြီး ထည့်ပေးစေချင်တဲ့ အကြောင်းတစ်ခု ဆရာ ပြောပြချင် တယ်။ လူတိုင်း လည်း မသိဘူး။ အကယ်ဒမီ အကြောင်း ရေးတဲ့လူတိုင်းလည်း မသိဘူး။ သိ လည်း မရေးကြ ဘူး။ ဘာလဲဆိုတော့ အကယ်ဒမီ ရသွားတဲ့ ဒေါ်ခင်ညွန့် ကိစ္စပဲ။ အဲဒီအချိန်က ဇာတ်ပို့ ဇာတ်ရံ မင်းသားကြီး၊ မင်းသမီးကြီး အကယ်ဒမီဆုပေးတဲ့ အစဉ်အလာ မရှိဘူး။ မပေးသေးတဲ့ အချိန်မှာ ဒေါ်ခင်ညွန့် က "ကကြီးရေ က" မှာ ဘယ်လောက် တော်သလဲဆိုတော့ အကယ်ဒမီ လူကြီးတွေက ဒီ အဘွားကြီး ကို သူတို့ အကယ်ဒမီ မပေးဘဲ မနေနိုင်အောင် သူတို့ ခံစားရတယ်။

ထွန်းဝေ က မြတ်မွန်နဲ့ ပြဿနာရှုပ်ပြီး အမှားအယွင်းတွေ ဖြစ်မိတယ်။ ဒါပေမဲ့ သူ့မှာကလည်း စေ့စပ်ထား တဲ့သူ ရှိတော့ ပဲခူးကို လိုက်သွားရမယ့်အချိန်၊ အဲဒီအချိန်မှာ မအေကြီးက သမီးနဲ့ သမက်လောင်းကြားမှာ ဗျာများနေတဲ့ ပုံ ကို ထိထိမိမိ လုပ်သွားတယ်။ ဘာပြောရသလဲဆိုတော့ "မောင်ထွန်းမြင့်ရယ် ... အမာ မင်းကို ဘယ်လောက်ထိ ချစ်တယ်ဆိုတာ မင်းသိပါတယ်။ မင်း ဘယ်လောက်ချစ်တယ် ဆိုတာလည်း အမာ သိပါတယ်။ ဒါပေမဲ့ အခြေအနေအရ ဖြစ်လာတော့ မင်း ချစ်တာကို စွန့်လွှတ်လိုက်ပါတော့။ အမာ့ အပေါ် မင်းချစ်တဲ့ အချစ်ကို စွန့်လွှတ်လိုက်ပါတော့။ နောက်တစ်ခုက မင်းကိုချစ်တဲ့ အမာ မင်းမျက်နှာကို မကြည့်ချင် တော့လောက်အောင်၊ မုန်းသွားအောင် လုပ်ပေးခဲ့ပါ" လို့ ပြောတဲ့နေရာမှာ အကယ်ဒမီ လူကြီး တွေ ကိုယ်တိုင် မျက်ရည်လည် ရပါတယ်လို့ ဖွင့်ပြောခဲ့ကြတယ်။ ဒီအကွက်နဲ့ ရှေ့က အကွက်တွေ ပေါင်းပြီး ဒီအဘွားကြီး ကို ပေးကို ပေးရမယ်ဆိုပြီး ပေးခဲ့ကြတာပဲ။ ဇာတ်ပို့ဆုကို ထွင်ပြီး ပေးခဲ့တာပဲ။

အဲဒီကစပြီး ဒီဆုကို ဒီနေ့ထိ ဆက်ပေးနေကြတာပဲ "
" အောင်မြင် တဲ့ ရုပ်ရှင်ကားတစ်ကား ဖြစ်လာဖို့ ဘာတွေ အရေးကြီးဆုံးလဲ ဆရာ "
" အောင်မြင်ဖို့ ဆိုတဲ့ နေရာမှာ နှစ်မျိုးရှိတယ်။ အနုပညာအရ အောင်မြင်ဖို့ ဆိုတာကတစ်မျိုး၊ ငွေရေး ကြေးရေး အရ အောင်မြင်ဖို့ဆိုရင်တော့ ပရိသတ်ကြိုက်တဲ့ မင်းသား၊ မင်းသမီးတွေနဲ့ရိုက်။ အခုခေတ် စကား အရ ပြောရရင် ထိုးတာတွေ၊ ကြိတ်တာတွေ၊ သတ်တာတွေ၊ ပုတ်တာတွေ များများထည့်။ မင်းသား နဲ့ လူဆိုးနှစ် ဆယ်လောက် ထိုးပြီး နောက်ဆုံးမှာ မင်းသားပဲနိုင်။ အဲဒါမျိုးဆိုရင် ငွေရေးကြေးရေးအရ အောင်မြင် မှာပဲ။

အနုပညာအရ အောင်မြင်ချင်ရင် လာလိုသလဲဆိုတော့ ဥပမာအားဖြင့် ရုပ်ရှင် လောကမှာ နာမည်ကြီးမင်း သား၊ မင်းသမီး တွေ ရှိတယ်။ နာမည်ကြီးမင်းသားနဲ့ ရိုက်တယ်။ ဇာတ်ကသိပ်ကောင်းတယ်။ အဲဒီဇာတ်မှာ မင်းသား က ၀တ်လုံ ဆိုပါတော့။ နာမည်ကြီး မင်းသားတိုင်း ၀တ်လုံနေရာမှာ ထားလို့ရသလား။ သိပ်ကောင်း တဲ့ ဇာတ်မှာ မင်းသားက စစ်ဗိုလ်ဆိုပါတော့၊ ဒီနေ့ နာမည်ကြီးမင်းသားတိုင်း စစ်ဗိုလ်နေရာ ထားလို့ရမလား။ ဇာတ်မှာ မင်းသမီးက ကျောင်းအုပ်ဆရာမကြီး ဆိုကြပါစို့။ ဒီဇာတ်မှာ အခု ဒါရိုက်တာ တွေ၊ ကုမ္ပဏီပိုင်ရှင် တွေက ဒီနေ့ နာမည်ကြီး မင်းသမီးကို ထည့်မှာပဲ။ နာမည်ကြီး မင်းသမီးတိုင်းက ကျောင်းအုပ် ဆရာမကြီး နဲ့ တူနိုင်ပါ့မလား။ ကုန်ကုန်ပြောရရင် မျက်ခုံးမွှေးသေးသေး ရိတ်တာကအစ တူနိုင် ပါ့ မလား။

ဒါကြောင့် ဇာတ်ကားကောင်းတစ်ခု ဖြစ်လာဖို့ ဆိုတာ ဇာတ်အိမ်ဇာတ်ကွက် ခိုင်မာဖို့ လိုသလို ပါဝင်သရုပ် ဆောင်ကြ တဲ့ သူအားလုံး၊ နောက်ဆုံး ဒရိုင်ဘာက အစ ဂရုစိုက်ဖို့ လိုတယ်။ သူ့နေရာနဲ့သူ အံဝင်ခွင့်ကျ ရှိရ မယ်။ ကိုယ့်နှမလေးကို သိပ်ချစ်တဲ့ အစ်ကို နေရာမျိုးမှာ အံ့ကျော်နဲ့ ခင်သန်းနုကို ထားရင် ဖြစ်နိုင်ပါ့မလား။ ရုပ်ချင်းက ဒါလောက် ကွာနေတာကို။ ဆရာကတော့ ဒါတွေက အစ ဂရုစိုက်တယ်။ အံ့ကျော် ကို ထည့်ထား ကတည်းက ဒီကောင် တစ်ချိန်ချိန်မှာ ဆိုးတော့မှာပဲ ဆိုတာ ပရိသတ်က တွက်ထား ပြီးပြီ။ ဆရာ လိုချင်တာက ဆိုးရမယ့်ကောင် ဆိုရင် ပျော့ပျော့နွဲ့နွဲ့ကလေး နေပြီး လိုအပ် လာတဲ့ အချိန်ကျမှ ဒိုင်းခနဲ ဆိုးပြလိုက်မယ်။ ဒါမှ ဇာတ်ကားကောင်းတစ်ကား ခေါ်တယ်။ ကြိုသိနေရင် ဇာတ် ကားကောင်း ဖြစ်မလာဘူး။

ပြောရရင်တော့ မကောင်းပါဘူး။ ခုဥစ္စာက စားရမလား ဆိုပြီး ကားရိုက်နေကြတာကိုး။ ဆရာတို့ကျတော့ စား ရရင် စားရ၊ မစားရရင်လည်းနေ ကိစ္စမရှိဘူး။ ကိုယ် လုပ်လိုက်တဲ့ ပညာလေးတစ်ခု ပိတ်ကားပေါ်မှာ ကြည့်ရမယ့် ပရိသတ်ကို တင်ပြနိုင်မယ်ဆိုရင် ကျေနပ်တယ်။ ချီးမွမ်းတာလည်း ရှိပါတယ်။ ကဲ့ရဲ့တာလည်း ရှိပါတယ်။ ကဲ့ရဲ့တဲ့လူ ကိုးဆယ်ထဲက ဆယ်ယောက် ချီးမွမ်းရင် တော်ပါပြီ။
နောက်တစ်ခုက ဆရာက ပရိသတ်အကြိုက် မလိုက်ဘူး။ ပရိသတ်အကြိုက် လိုက်ရင် ကိုယ်က နောက် လိုက်ပဲ။ ဆရာ မဟုတ်တော့ဘူး။ ပရိသတ်ကို ကိုယ်က ဦးဆောင်နိုင်ရမယ်။ ပညာပေးနိုင်ရမယ်။ သူတို့ အကြိုက် လိုက်ချင်ရင် တော့ လွယ်ပါတယ်။ ကရာတေးတွေ များများထည့်ပေါ့။

အဲဒီတော့ ညီလေး ပြောတဲ့ ဇာတ်ကားကောင်း ဆိုတဲ့နေရာမှာ အနုပညာအရလည်း ကောင်းရမယ်။ ၀င်ငွေ အရလည်း ကောင်းရမယ်၊ ညီညီညွတ်ညွတ် ဖြစ်လာဖို့ရာဆိုတော့မလွယ်ပါဘူး။ ငွေမရချင် နေပေစေ ငါ့အနု ပညာကို ပြရမယ်ဆိုတဲ့ စိတ်နဲ့ ရိုက်ရင် အနုပညာ ပေါ်လာမှာပဲ"

" ကျေးဇူးတင်ပါတယ် ဆရာ။ ဆရာ ရိုက်တဲ့ ဧည့်သည်ဇာတ်ကားမှာ မြတ်မွန် နဲ့ တွဲပြီး ဆရာကိုယ်တိုင် ၀င်ပြီး သရုပ်ဆောင် ခဲ့ တာ တွေ့ရပါတယ်။ ဘယ်လို ရည်ရွယ်ချက်နဲ့ သရုပ်ဆောင်ခဲ့တာလဲ ဆရာ "
" အမှန် က လုံးဝ ရည်ရွယ်ချက် မရှိပါဘူး။ စိတ်လည်း မကူးခဲ့ဘူး။ "ကကြီးရေ က" ရိုက်တယ်။ ပြီးတော့ "အငိုလွယ်သည်" ရိုက်တယ်။ "အငိုလွယ်သည်" ရိုက်ပြီးတော့ ဆရာနဲ့ မြတ်မွန်နဲ့ အိမ်ထောင်ကျတယ်။ အဲဒီ အချိန်မှာ "ဧည့်သည်" ဇာတ်ကားရိုက်တဲ့အတွက် နာမည်ကြီး မင်းသားတစ်ယောက်ကို တစ်သောင်းငါးထောင် နဲ့ ငှားလိုက်တယ်။ ငွေတွေ ဘာတွေလဲ ချေပြီးပြီ။ ဆရာနဲ့ မြတ်မွန် မန္တလေးကို ထွက် သွားကြပြီး ပြန်လာတော့ "ဧည့်သည်" ကို စ ရိုက်တယ်။ တခြားအခန်းတွေ အရင်ရိုက်ပြီး ဘယ်နေ့ ဘယ်ရက် မှာ မင်းသားအခန်း တွေ ရိုက်မယ်ဆိုပြီး ချိန်းလိုက်တယ်။

ဆက်ရန်
.

No comments: