Tuesday, May 31, 2011

တင်မောင်မြင့် ဘာသာပြန် သတင်းမုဆိုး အပိုင်း (၂၄)

အခန်း(၂၈)
အယ်လီ

သန်းပေါင်းများစွာသော အမေရိကန် နိုင်ငံသားများနှင့်အတူ အယ်လီ သည် တယ်လီဗေးရှင်း စက်ရှေ့တွင် တစ်ပတ်လုံး ထိုင်ကြည့်သည်။
သမ္မတ ၏ အလောင်းကို လေတပ်မတော်လေယာဉ်ဖြင့် အင်ဒရူး လေတပ်စခန်း သို့ သယ်ဆောင် လာကြသည်။ အခေါင်းကို သူနာပြုကားထဲ ထည့်သည့်အချိန်အထိ ဂျက် ကလင်းက ဒါးလက်စ်တွင် ၀တ်သည့် သွေးစွန်းနေသည့် ပန်းနုရောင် အင်္ကျီကို ၀တ်ထားဆဲ။ သမ္မတ၏ အခေါင်းကို နိုင်ငံတော် အလံဖြင့် ပတ်ပြီး အိမ်ဖြူတော် သို့ စစ်အခမ်းအနားဖြင့် ပို့သည်။ သမ္မတကတော်က ခပ်မတ်မတ် လျှောက်ပြီး လိုက်ပါ လာ၏။

နောက်တစ်နေ့ စနေနေ့တွင် ရာသီဥတုမှ အုံ့မှိုင်းညို့ဆိုင်းပြီး နောက်ပိုင်းတွင် မိုးရွာချသည်။ တစ်ကမ္ဘာလုံး မမေ့နိုင်သည့် ထိုနေ့ မြင်ကွင်းကို အယ်လီစောင့်ကြည့်နေသည်။ အိမ်ဖြူတော်ကို ဦးတည်ပြီး ၀မ်းနည်း မှတ်တမ်း ရေးဖို့ စောင့်နေသည့် လူတန်းကြီးမှာ တမျှော်တခေါ်ကြီး ဖြစ်သည်။
ကြေးနန်းသတင်းများသည် ပါရီ၊ လန်ဒန်၊ ဘာလင်နှင့် တိုကျိုမြို့ကြီးများသို့ စက္ကန့်မလပ် တဖျပ်ဖျပ် လွှင့်နေ၏။ ကွယ်လွန်သူ သမ္မတအား ကမ္ဘာအရပ်ရပ်မှ အသုဘရှု ရောက်လာကြသည့် ပရိသတ်အား ဘယ်လီ ငေးကြည့်နေ၏။

တနင်္ဂနွေနေ့ မနက်ပိုင်းတွင် နေသာသော်လည်း ရာသီဥတုမှာ အေးအေးမြမြရှိ၏။  တယ်လီဗေးရှင်း စက်ရှေ့မှ အယ်လီ မထသေး။
သမ္မတ၏ ရုပ်လောင်းကို အိမ်ဖြူတော်မှ မြင်းက ရထားပေါ်သို့ သယ်ယူကြပြီး ကယ်ပီတော် အဆောက်အအုံ သို့ သယ်ယူပို့ဆောင်မည်ဖြစ်သည်။ အသုဘပို့သည့် လူတန်းကြီးမှာ ငြိသက်စွာဖြင့် ယူကျုံးမရ တသသ ဖြစ်နေ ကြသည်။

ကြေကွဲဖွယ် ဘင်ခရာသံများမှအပ ပင်ဆီဗားနီးယား ရိပ်သာတစ်လျှောက်တွင် တိတ်ဆိတ် ငြိမ်သက်နေ။
ဒါးလက်စ်၊ အချုပ်ခန်းမှ ထောင်ကြီးချုပ်သို့ ပို့စဉ်တွင် သမ္မတ ကို ပစ်သည့်လက်ဖြောင့် သေနတ်သမားဟု ယူဆ ရသော လီးဟာဝေးအော့ဇွဲအား အနီးကပ်ပစ်သတ်သွားသည့် မြင်ကွင်းကို လည်း အယ်လီ ကြည့်လိုက် ရသည်။

သည်ဖြစ်စဉ်အားလုံးကို မအိပ်မနေ အယ်လီစောင့်ကြည့်နေစဉ် တီဗွီတွင် အိုဝင်ကို တွေ့လိုတွေ့ငြား ရှာဖွေ ကြည့်သည်။ သို့သော် အရိပ်အယောင်မျှ မတွေ့ရ။
သူ ဘယ်များ ရောက်နေပါလိမ့်. သတင်းယူဖို့ ဒါးလက်စ်ကို ရောက်နေမလား၊ ဒါမှမဟုတ် ၀ါရှင်တန် မှာပဲ ရှိနေမလား။ သူ့အခန်းမှာ သူမရှိသည်ကတော့ သေချာသည်။ ဖုန်းကိုင်မည်သူ့ မရှိ။ သတင်းမဂ္ဂဇင်းတိုက် ဖုန်း ကတော့ လုံးဝ ဆက်မရ။ သူလုံးဝ မေ့သွားပြီ ထင်ပါရဲ့။

သူ ဘယ်မှာ ရှိနေ ရှိနေ၊ ဘာလုပ်နေ လုပ်နေ၊ သူ့အာရုံတွင် မိမိ မရှိတော့ပြီဟု အယ်လီ ၀မ်းနည်း ပက်လက် တွေးမိလေသည်။
နောက်ဆုံး တနင်္ဂနွေနေ့ညပိုင်းတွင်မှ အယ်လီ၏ တယ်လီဖုန်းသံ မြည်လာသည်။
 
အခန်း(၂၉)
လင်ကီ

ဟန့်ဂရင်နီ၏ ရုံးခန်းထဲမှ ရုံးသုံး ရေဒီယိုကလေး လင်ကီ ဖွင့်နားထောင်သည်။ သမ္မတ လုပ်ကြံခံရ ခြင်း သတင်း အတည်ပြု ကြေညာချက်ကို လင်ကီ ကြားလိုက်သ်ည။
စာမူတွေ စုပုံနေသည့် အခန်းထဲတွင် လင်ကီတစ်ယောက်တည်း ငိုချလိုက်သည်။ သမ္မတ၏ သတင်းဆိုး ကြောင့် အဖေနှင့် အမေ ပြေးသတိရမိပြန်၏။
သမ္မတ က ငယ်ငယ်ကလေး ရှိသေးတာပဲ၊ အဖေနှင့် အမေလည်း ငယ်ကြပါသေးသည်။ သမ္မတတွင် ရှုမျှော် မဆုံးသည့် အနာဂတ် ရှိသည်။ အဖေနှင့် အမေလည်း ထိုနည်းတူစွာပင်။

တိုင်းပြည် အတွက်ရော သမ္မတအတွက်ပါ လင်ကီ ငိုကြွေခြင်း ဖြစ်ပါ၏။ ကျန်ရစ်သူ မိသားစုနှင့် ကနေဒီ မျိုးရိုး တစ်ခုလုံးအတွက် ငိုကြွေးခြင်းလည်း ဖြစ်ပါ၏။ မျက်ရည်များတွင် မိမိကိုယ်တိုင် အတွက် ကျသည့် မျက်ရည်ပေါက် များလည်း ပါ၏။ ပြီးတော့ ပီတာ့အတွက်ရော ဟန့်အတွက်ပါ ငိုကြွေးမိလေ၏။ ဖြစ်သွား သည့် ဇာတ်လမ်းနှင့် ဖြစ်သင့်သည့် ဇာတ်လမ်းကို တွေးပြီး ငိုကြွေးခြင်း လည်း ဖြစ်သည်။
ရှိုက်ကြီးတငင် ငိုကြွေးနေသည့် လင်ကီသည် ရုံးခန်းထဲသို့ ဟန့် ၀င်လာသည်ကို သတိမထားမိ လိုက်ပေ။

"မင်း ဒီမှာ ဘာလာလုပ်နေတာလဲ"
လွန်ခဲ့သည့် စနေနေ့က ကွန်မိုဒိုဟိုတယ်တွင် ဖြစ်ခဲ့သည့် ကိစ္စနောက်ပိုင်း လင့်ကီကို ပထမဆုံး သူ စကား စပြောခြင်း ဖြစ်၏။ သူ့ကြည့်ရသည်မှာ ပေါက်ကွဲတော့မည့် မီးတောင်တစ်ခုနှင့် တူနေ၏။ အနိုင်နိုင် ထိန်းထားရပုံ။ လင်ကီ့အပြုအမူသည် သူ့အတွက် လုံးဝ ခွင့်လွှတ်နိုင်စရာ ရှိဟန် မတူ။

"သမ္မတကနေဒီ လုပ်ကြံခံရလို့တဲ့၊ သေသွားပြီတဲ့" မျက်ရည် သုတ်ပြီး သူ့ကို မော်ကြည့်ရင်း လင်ကီ ဖြေသည်။ ရေဒီယို လှမ်းပိတ်ရင်း "မရက်စက်လွန်းဘူးလားဟင်"
"ရက်စက်တယ် ဟုတ်လား၊ ငါ မေးတာ အဲဒီကိစ္စ မဟုတ်ဘူး၊ မင်း ငါ့အခန်းထဲမှာ ဘာလာလုပ်နေ တာလဲ မေးတာ" လင်ကီ ကတိုက်ကရိုက်ထသည်။

"ကျွန်မ တောင်းပန်ပါတယ်"
"အလုပ်ချိန်မှာ မင်း ဘာလို့ အလုပ်မလုပ်တာလဲ။ လုပ်စရာ မရှိဘူးလား"
"ဒီလို အချိန်မှာ အလုပ်ထဲ စိတ်ဝင်စားဖို့ မလွယ်ပါဘူး"
"ဒါဆိုရင်တော့ မင်း ဒီမှာ ဆက်မလုပ်နဲ့"
သူက စီးကရက် မီးညှိပြီး ကုလားထိုင်တွင် ၀င်ထိုင်သည်။ သည်အလုပ်သည် လင်ကီနှင့် ခွင့်အကျဆုံး စိတ်ဝင်စားဖို့ အကောင်းဆုံးအလုပ် ဖြစ်သည်။

"ဆက်မလုပ်နဲ့ ဟုတ်လား၊ ဒါနဲ့ ကျွန်မ အရည်အချင်းကို သဘောကျတယ်ဆို"
"ဟိုတုန်းက ဟုတ်တယ်၊ ခုမဟုတ်တော့ဘူး"
ပြောပြောဆိုဆို တယ်လီဖုန်း ကောက်ယူပြီး တစ်နေရာကို ဆက်နေသည်။

"ရှင် ကျွန်မကို အလုပ်ဖြုတ်လိုက်ပြီလား"
"ဒီမယ် မစ္စက်ဒက်စမွန်၊ ခင်ဗျားကို ကျုပ် ရာထူးတိုးပေးရမှာလား၊ ငွေစာရင်းဌာနမှာ ရစရာရှိတာ တွေ ထုတ်ယူ သွားပြီး ဘယ်တော့မှ ဒီကို ပြန်မလာနဲ့တော့၊ ကျုပ် မင်းကို မတွေ့ချင်တော့ဘူး"
အသား တွေ ဆတ်ဆတ်တုန်လျက် ဟန့်၏ ရုံးခန်းမှ လင်ကီ ထွက်လာခဲ့သည်။ ဘာကိုမှ ဆက်မစဉ်းစား တတ်အောင် ဒေါသ ဖြစ်နေ၏။ အသိအာရုံတွေ ထွေပြားေ၀၀ါးနေ၏။ စင်စစ် အစွန့်ပစ်ခံရခြင်းအတွက် ငုပ်လျှိုး နေမည့် ဆုံးရှုံးမှုအားလုံး ဘွားကနဲ ပြန်ပေါ်လာခြင်း ဖြစ်၏။ မိဘ နှစ်ပါး ဆုံးရှုံးမှု အပါအ၀င် အခြား အခြား သော ဆုံးရှုံးမှုများ၊ ဘ၀ပျက်ပြီဟုပင် စိတ်ထဲ ထင်လိုက်၏။

သူ့ရုံးခန်းထဲမှ ထွက်အလာတွင် ၀တ္ထုတစ်အုပ် ထုတ်ဝေဖို့အကြောင်း တိုက်တစ်တိုက်နှင့် သူပြော နေသံကို သဲ့သဲ့ ကြားခဲ့၏။ စိတ်ပါလက်ပါနှင့် အလောတကြီး ပြောနေခြင်းမျိုး။
"သတင်းမဂ္ဂဇင်း အိုဝင်ကာဆယ်၊ ဒါလက်စ်ကို ရောက်နေတယ်"
လင်ကီ ဆိုသည့် မိန်းကလေး ကိစ္စကို သူ့ခေါင်းထဲတွင် ဘာမှ မကျန်တော့သလို။ မိမိကို မောင်းထုတ် လိုက်ပုံက ကိုယ်ခွဲစိတ်ထားသည့် သွေးသံရဲရဲ လူနာကို ပြန်ချုပ်ဖို့ တခြားလူတွေနှင့် ပစ်ထားခဲ့သည့် ဆရာဝန်တစ်ယောက်နှင့် တူနေ၏။

သူ ဆက်ပြောနေသည်။
"တနင်္ဂနွေနေ့ညမှာ သူ့ဆီက စာမူရနိုင်တယ်။ ဒါဆို အင်္ဂါနေ့ကို စာအုပ်ထွက်အောင် လုပ်နိုင်တာပေါ့"
 
အခန်း(၃၀)
လင်ကီ

ဒါးလက်စ်စံတော်ချိန် ညနေ ၁နာရီတွင် အမေရိကန် ပြည်သူတို့၏ ၆၈ရာခိုင်နှုန်း လုပ်ကြံမှု အကြောင်းကို သိသွားကြသည်။ သညသန်းခေါင်ယံ မတိုင်မီ သမ္မတကွယ်လွန်ကြောင်း သတင်းကို ၉၉.၈ရာခိုင်နှုန်း ကြားသိကြသည်။ တစ်တိုင်းပြည်လုံး အုံးအုံးကျက်ကျက် ဖြစ်သွား၏။ ဘယ်တုန်းကမှ မကြုံဖူးသည့် ၀မ်းနည်း ပူဆွေး မှုမျိုးဖြင့် တစ်နိုင်ငံလုံး သောက ရောက်ကြရသည်။
ဝီလျံမန်ချက်စတာ၏ သမ္မတတစ်ဦး အနိစ္စရောက်ခြင်းစာအုပ်မှ။

လင်ကီသည် တုန်လှုပ်ချောက်ချားစွာဖြင့် တတိယရိပ်သာလမ်းထဲကို ချိုးဝင်လာခဲ့သည်။ တစ်မြို့လုံး တိတ်ဆိတ်ငြိမ်သက်နေ၏။ လင်ကီသည် ဘယ်ကို သွားနေမှန်း သူ့ကိုယ်သူ မသိ။ ခေါင်းထဲတွင် အတွေးပေါင်းစုံ ရှုပ်ယှက်ခတ်လျက် ပါးပြင်ပေါ်တွင် မျက်ရည်တွေ တွေတွေစီးကျလျက်။
သူမျက်လုံးများက ဘာကိုမှ မမြင်။ သူ့အသိအာရုံသည် ဟင်းလင်းပြင် ဖြစ်နေ၏။ ခံစားမှု ဘာမှ မရှိဘဲ ထုံထိုင်း နေသည့် ကာလမျိုး။

အိမ်ပြန်ရောက်တော့ နှစ်ချက်ခွဲနေပြီ။ မျက်နှာသစ်၊ သွားတိုက်ပြီး ည၀တ် အင်္ကျီလဲလိုက်သည်။ အိပ်ချင်သည်။ အိပ်ဆေးတစ်လုံး သောက်လိုက်ချင်သည်။ သို့သော် မရှိ။ ဟန့်ပြောသည့်အတိုင်းပင် လင်ကီ သူ့ကိုယ်သူ ကြောက်နေခြင်း ဖြစ်သည်။ သူများတွေအတွက်လည်း မိမိက အန္တရာယ်၊ မိမိ အတွက်လည်း မိမိ ကိုယ်တိုင် အဆိပ်အတောက်။
အိပ်ရာဝင်မည် ပြုစဉ် ပီတာ့ ခေါ်သံကြားရသည်။ ဧည့်ခန်းထဲမှ လက်ကိုင်အိတ်ကို မြင်သွားပုံရ သည်။

"လင်ကီရေ မင်းပြန်ရောက်နေပြီလား"
ပီတာက ဝေါလ်စထရိမှ မြေအောက်ရထားဖြင့် ပြန်လာခဲ့ပြီး လင်ကီ့ ရုံးကို ၀င်လာခဲ့သေးသည်။ မျက်နှာ ဖြူဖပ် ဖြူရော်နှင့် ငိုနေသည့် ဧည့်ကြိုစာရေးမကလေး က အိမ်ပြန်သွားကြောင်း မိနစ်များစွာ ကြာမှ ပီတာ ရောက်လာခြင်း ဖြစ်၏။
အထဲမှာ ပြန်ထူးသံမကြားရသဖြင့် ထပ်ခေါ်သည်။

"လင်ကီ"
လင်ကီ ပြန်မထူး၊ မီးဖိုခန်းကို ဖြတ်ပြီး အိပ်ခန်းထဲသို့ ပီတာ ၀င်လာသည်။
"နေမကောင်းဘူးလားဟင်"
လင်ကီ့ကို နေ့ခင်း နေ့လယ်တွင် ဘယ်တော့မှ အိပ်ရာထဲတွင် မတွေ့ဖူးခဲ့။

"ကောင်းပါတယ်"
လင်ကီ တိုးတိုးကလေး ပြန်ဖြေသည်။ သို့သော် သူ့ကြည့်ရသည်မှာ နေကောင်းပုံမရ။ မျက်နှာက အရမ်း ပင်ပန်းနေပုံ၊ မျက်ကွင်းတွေ ညိုနေ၏။ သမ္မတ ကွယ်လွန်ကြောင်း သတင်းကြားပြီး ပီတာ လည်း ငိုထားပြီးပြီ။ တစ်မြို့လုံး ဣနြေ္ဒမဆည်နိုင်ဘဲ ငိုနေကြသည် မဟုတ်လား။ သို့သော် လင်ကီ့ ကြည့်ရသည်မှာ ထို့ထက် ပို၍ ငိုထားပုံ။
မီးရောင်ကာ မျက်လုံးစွပ်ကို ကပ်ထားသဖြင့် သူ့မျက်လုံးများကို ပီတာ မမြင်စေရ။

"တီဗွီဖွင့်ထားမယ်နော်"
လင်ကီ သွေးလန့်နေသည်ဟု ပီတာ ထင်လိုက်သည်။ မျက်နှာက ဖယောင်းရုပ်လို ဖြစ်နေ၏။ ဒါးလက်စ် က လာသည့် သတင်းကြောင့်ဟု ကျိန်းသေတွက်လိုက်၏။
ပီတာ ခလုတ်ဖွင့်လိုက်သည်။ ရုပ်သံ ထုတ်လွှင့်ရုံတိုင်း သမ္မတ လုပ်ကြံခံရသည့် သတင်းကိုပဲ အလု အယက် လွှင့်နေကြ၏။ ပီတာက ခုတင်စွန်းတွင် ထိုင်ပြီး လင်ကီ့ လက်ကို လှမ်းဆုပ်လိုက်သည်။
"နေကောင်းပါတယ်"
ပြီးမှ ငိုချလိုက်ပြန်သည်။ မျက်ရည်တွေက ထွက်ပေါက်မရှိသဖြင့် မျက်လုံးစွပ်ထဲတွင် စုဝေးနေကြ ၏။ မျက်ရည်တွေထဲတွင် နစ်မွန်းနေပြီဟု လင်ကီ ထင်လိုက်။

"ဘယ်လိုဖြစ်တာလဲဟင်"
ပီတာက မေးသည်။
"ဘာမှ မဖြစ်ပါဘူး"
မျက်ရည်တွေ စီးကျအောင် မျက်လုံးစွပ်ကို လင်ကီ အသာမ ပေးလိုက်သည်။ ပြီးတော့ ခုတင် တစ်ဖက်တွင် ကပ်ပြီး ကွေးနိုင်သမျှ ကွေးနေသည်။ သူ့ကို တစ်စုံတစ်ယောက် လာထိမှာကို ကြောက်နေသည့်အလား။

ပီတာက သူ့ကို နှစ်သိမ့်ဖို့ လက်ကမ်းတော့ လင်ကီ တစ်ဖက်ကို အတင်း တိုးကပ်သွားပြန်သည်။
"လင်ကီ တစ်ယောက်တည်းနေပါရစေ ပီတာရယ်၊ နော်"
သူ့အသံက မနည်းနားထောင်ယူရ၏။

စနေနေ့နှင့် တနင်္ဂနွေနေ့ နှစ်ရက်လုံးလုံး လင်ကီ အိပ်ရာပေါ်မှ မထဘဲ လဲ နေသည်။ မျက်နှာလည်း မသစ်၊ သွားလည်း မတိုက်၊ အစာလည်း မစား။ မျက်ရည်တွေက မျက်နှာပေါ်တွင် စိုလိုက် ခြောက်လိုက်။
"ဘယ်လိုဖြစ်တာလဲကွာ၊ ကိုယ် ဘာလုပ်ပေးရမလဲဟင်"
လင်ကီ အပါအ၀င် သန်းပေါင်းများစွာသော အမေရိကန်လူမျိုးတိုင်း လိုပင် လင်ကီ နှင့် ပီတာတို့ အခန်း ထဲတွင်လည်း တီဗွီစက် ကို တစ်နေကုန် ဖွင့်ထား၏။
အသုဘ ဓမ္မတေးသံကို ကြေကွဲဖွယ် တောက်လျှောက် ကြားနေရသည်။
"ပီတာ ဘာမှ လုပ်ပေးလို့ မရပါဘူး"

တနင်္လာနေ့တွင်လည်း လင်ကီ အိပ်ရာထဲမှာပင် မျက်ကွင်းတွေ ညိုသည်ထက် ညိုလာသည်။ အရမ်း ပိန်ကျ သွားသည်။ တစ္ဆေရုပ်တစ်ရုပ်နှင့် တူလာ၏။ ပီတာ အထိတ်တလန့် ဖြစ်လာပြီ။ ဘယ်လိုချော့ချော့ မတုံ့ပြန်။ ဘယ်လို နှစ်သိမ့်သည် ဖ်ြစစေ၊ လင်ကီ မတုန်မလှုပ်၊ အလုပ်ကို ဒါလောက်စွဲလမ်းသည့် ငါ့မိန်းမ ဘယ်လို ဖြစ်တာပါလိမ့်ဟု ပီတာ တွေးမိသည်။ အိပ်ရာမှ မထဘဲ အ၀တ်မလဲဘဲ ဆက်အိပ်နေသည့်အခါ ပီတာ မေးရ တော့သည်။

"မင်းအလုပ်မသွားဘူးလား လင်ကီ"
"ဟင့် အင်း"
ခြောက်ကတ်ကတ် အသံဖြင့် ဖြေသည်။ ပီတာ ပိုလန့်သွား၏။
"ဟင် ဘယ်တုန်းကမှ ရုံးတက်မပျက်ခဲ့ဘဲနဲ့"
နေထိုင် မကောင်းသည့် ရက်များမှာပင် ရုံးမပျက်ခဲ့သည့် လင်ကီ။
"သွားဖို့ မလိုတော့ဘူး၊ လင်ကီ အလုပ် ပြုတ်ခဲ့ပြီ"
"ဘာ မင်းကို အလုပ်ဖြုတ်လိုက်သည် ဟုတ်လား"
ပီတာ က မယုံကြည်နိုင်စွာ မေးသည်။ ဒီအကြောင်း ဘာကြောင့် သူ မပြောဘဲနေတာလဲ။
"ဟုတ်တယ်၊ သူ လင်ကီ့ကို ဖြုတ်လိုက်ပြီ"
ပြောပြီး လင်ကီ တစ်ဖက်သို့ လှည့်လိုက်၏။

ဗုဒ္ဓဟူး နေ့ တွင် လင်ကီ ပြနေကျ ဆရာဝန်ကို ပီတာ ခေါ်လာသည်။ တစ်ခါတုန်းက လင်ကီ သူ့ကိုယ်သူ သေကြောင်း ကြံခဲ့ဖူးကြောင်းနှင့် စိတ်အနေမမှန်မှာကို စိုးရိမ်ကြောင်း ပြောပြလိုက် သည်။ စိတ်ကျရောဂါ ၀င်သွားမည် ကို ပီတာ တွေးပူလာသည်။ သောကြာနေ့မှ စပြီး ပြောင်းလဲနေပုံ ကိုလည်း ပြောပြလိုက်သည်။
"စိတ်ရောဂါ အကြောင်းတော့ ကျွန်တော်လဲ သိပ်မသိဘူး။ သက်ဆိုင်တဲ့ ဆရာ တစ်ယောက် ယောက်နဲ့ ပြဖို့ ကောင်းတယ်" ဟု ဆရာဝန်က အကြံပြုသည်။
သူ ထောက်ခံသည် ဆရာဝန်၏ နာမည်နှင့် ဖုန်းနံပါတ်ကိုလည်း ရေးယူထားလိုက်၏။ ဒေါက်တာ အဲလျော့၊ လန်ဒေါ ဟူသည့် စိတ်ကုဆရာဝန်။

"စကားတွေ ထိုင်ပြောနေရမယ့် အလုပ်က ဘာအကျိုးရှိနိုင်မှာလဲ"
လင်ကီက ခံစားမှုကင်းသည့်အသံဖြင့် ပီတာကို ပြန်ပြောသည်။
"စမ်းကြည့်ရမှာပေါ့ကွာ၊ ဒီအတိုင်းဆိုရင် မင်း သေသွားနိုင်တယ် လင်ကီ"

ဆက်ရန်
.

No comments: